पत्रकारले सञ्चार साधनसहित देशैभर प्रदर्शन गरे, थप कार्यक्रम आइतबार आउने

चितवन । सरकारले प्रेस तथा अभिव्यक्ति स्वतन्त्रता कुण्ठित हुनेगरी संसदमा दर्ता गरेको मिडिया काउन्सिल विधेयकका विरुद्ध नेपाल पत्रकार महासंघले घोषणा गरेको पहिलो चरणको आन्दोलन सम्पन्न भएको छ । शुक्रबार पत्रकार महासंघको आयोजनामा देशैभर पत्रकारहरुले आफ्ना सञ्चार साधनसहित बृहद प्रदर्शन गरेका छन् ।

काठमाडौंमा पत्रकारहरुले संघीय संसद अगाडि आफ्ना सञ्चारका साधनसहित धर्ना दिएका थिए भने देशभर महासंघको जिल्ला शाखाको आयोजनामा धर्ना कार्यक्रम सम्पन्न भएको छ ।

चितवनमा नेपाल पत्रकार महासंघ जिल्ला शाखाको आयोजनामा भरतपुरमा शुक्रबार विहान पत्रकारहरुले आफ्ना सञ्चार साधनसहित प्रदर्शन गरेका छन् । पत्रकार महासंघको कार्यालय भवन अगाडि पत्रकारहरुले संसदमा दर्ता गरेको मिडिया काउन्सिल विधेयकका विरुद्ध प्रदर्शन गरेका हुन् । प्रदर्शनमा पत्रकार महासंघ तथा पत्रकार सम्वद्ध विभिन्न संघ संगठनका नेतृत्वलगायत क्रियाशिल पत्रकारहरुको सहभागिता थियो ।

प्रदर्शन कार्यक्रममा पत्रकार महासंघ, चितवनका अध्यक्ष राधेश्याम खतिवडाले मिडिया काउन्सिल विधेयक संविधानको मर्म र भावना विपरित ल्याइएकोले त्यसलाई स्वीकार गर्न नसकिने बताउनुभयो । उहाँले पत्रकारलाई नियन्त्रण गर्ने, क्षतिपूर्तिको नाममा लाखौँ रुपैयाँ तिराउने र समाचार लेखेकै आधारमा मुद्दा चलाएर जेल पठाउने काम लोकतन्त्रको मर्म विपरित भएकोले विधेयक संशोधन गर्नपर्ने धारणा राख्नुभयो ।

यसैबीच, नेपाल पत्रकार महासंघले आन्दोलनका थप कार्यक्रम घोषणा गर्न आइतबार महासंघको उपलब्ध केन्द्रीय समिति र सञ्चारसम्वद्ध संघसंस्थाका प्रतिनिधिहरुको बैठक बोलाएको छ । उक्त बैठकपछि आन्दोलनका थप कार्यक्रम घोषणा गरिने महासंघका महासचिव रमेश विष्टले बताउनुभएको छ । महासंघले पहिलो चरणको विरोध कार्यक्रम सफल पार्न सहयोग गर्नुहुने आम सञ्चारकर्मी, सञ्चार सम्वद्ध संघसंस्था, सञ्चारमाध्यम, र नागरिक समाजप्रति हार्दिक आभार व्यक्त गरेको छ ।