चितवनमा कोरोना संक्रमणबाट आज दोस्रो व्यक्तिको मृत्यु, कूल मृतकको संख्या १९ पुग्यो

चितवन । चितवनमा एकै दिन दुई जनाको कोरोना संक्रमणबाट मृत्यु भएको छ । चितवन मेडिकल कलेजमा उपचाररत गैंडाकोट नगरपालिका वडा नं. २ का ३७ वर्षीय पुरुषको दिउँसो २ः२० मृत्यु भएको अस्पतालका निर्देशक डा.दयाराम लम्सालले जानकारी दिनुभयो ।

मृतक पुरुष मिर्गौलाको रोगबाट ग्रसित थिए । भदौं ९ गते अस्पतालमा भर्ना भएका उनको भदौं १० गते कोरोना पुष्टि भएको हो । उनको आइसोलेसन वार्डमा उपचार भइरहेको थियो ।

यसअघि गयराति १२ः२३ बजे भरतपुर महानगरपालिका वडा नं. ११ की ४० वर्षीया कोरोना संक्रमितको सोही अस्पतालमा मृत्यु भएको थियो ।

योसंगै चितवनमा कोरोनाबाट मृत्यु हुनेको संख्या १९ पुगेको छ । जसमध्ये चितवनका १० जना, मकवानपुरका चार जना, नवलपरासी पूर्वका २, गोरखा, कैलाली र बाराका एक/एक जना रहेका छन् ।