आज दरखाने दिन

चितवन । महिलाहरुको महान चाड तीजको अघिल्लो दिन आज हिन्दू परम्परा अनुसार दर खाइँदै छ । भाद्र शुक्ल द्वितीया अर्थात हरितालिका तीजको अघिल्लो दिन तीजको निराहार व्रत बस्न शक्ति प्राप्तिका लागि नेपाली हिन्दु नारीहरुले दर खाने परम्परा रही आएको छ । दर खाने दिनमा विभिन्न मीठा परिकार बनाएर खाने र नाँचगान गरेर रमाइलो गर्ने चलन छ ।

दर खाने दिनको भोलिपल्ट तीज पर्व पर्दछ । तीजको दिन निराहार ब्रत बस्ने भएकाले त्यसको आडका लागि अघिल्लो साँझ पौष्टिक तत्व भएका खानेकुरा खाने परम्परा रही आएको छ ।

विवाहिता नारीहरु माईती घर गई आमा, दिदी बहिनीहरुसँग दुःख सुख साटासाट गर्ने, नाँचगान गर्ने र मिठो खाने परम्परा नेपाली समाजमा सदियौंदेखि चल्दै आएको हो । तर यस पटक कोरोना भाईरसका कारण सामुहिक रुपमा भेटघाट नगर्न सरकारले आग्रह गरेका कारण विगत वर्षहरुको जस्तो रौनक यस वर्ष देखिंदैन ।