१०९ वर्षिया बृद्धाको मृत्युपछि कोरोना संक्रमण पुष्टि

चितवन । जिल्लामा १०९ वर्षिया बृद्धाको मृत्युपछि कोरोना भाइरस (कोभिड–१९) संक्रमण पुष्टि भएको छ । पूर्वीचितवनको खैरहनी नगरपालिका वडा नं. ३ निवासी वृद्धाको आज मंगलबार बिहान १ः४५ बजे घरमै मृत्यु भएको हो ।

जिल्ला स्वास्थ्य कार्यालय चितवनका प्रमुख दिपकबाबु तिवारीका अनुसार कन्ट्याक्ट ट्रेसिङका आधारमा ती वृद्धाको सोमबार स्वाब संकलन गरी कोरोना परीक्षणका लागि भरतपुर अस्पताल कोभिड–१९ परीक्षण प्रयोगशाला पठाइएको थियो । मृत्यु पश्चात मात्रै ती वृद्धाको रिपोर्ट पोजिटिभ आएको छ । ती वृद्धालाई एक साता अघि भेटेका आफन्तलाई कोरोना पोजेटिभ आएपछि तीवृद्धाको पनि कोरोना परीक्षण गरिएको थियो ।

योसँगै चितवनमा कोरोना संक्रमणबाट मृत्यु हुनेका संख्या तीन पुगेको छ । यसअघि चितवनमा भरतपुर महानगरपालिका वडा नं. ११ का एक जना र भरतपुरमा उपचाररत कैलालीका एक जनाको कोरोना संक्रमणबाट मृत्यु भएको थियो ।