एसईईको नतिजा प्रकाशन

काठमाण्डौं । राष्ट्रिय परीक्षा बोर्डले माध्यमिक शिक्षा परीक्षा (एसईई) को नतिजा सार्वजनिक गरेको छ । बोर्डको सोमबार बसेको बैठकले नतिजा सार्वजनिक गर्ने निर्णय गरेको हो । ४ लाख ७२ हजार ७८ विद्यार्थीको परीक्षाफल प्रकाशित भएको हो । नतिजा टेलिफोन, एसएमएस र बेभसाइटमा हेर्न सकिन बोर्डले जनाएको छ ।

गत ६ चैतका लागि निर्धारित एसईई कोभिड–१९ का कारण अन्तिम समयमा स्थगित भएको थियो । परीक्षा नहुने भएपछि विद्यालयले गरेको आन्तरिक मूल्यांकनको आधारमा नतिजा सार्वजनिक गरेको हो ।

परीक्षाका लागि फारम भरेका मध्ये १० हजार ९ सय ८ विद्यार्थीको प्राप्ताङ्क विद्यालयहरुबाट प्राप्त नभएको बोर्डले जनाएको छ । परीक्षाका लागि ४ लाख ८२ हजार ९ सय ८६ विद्यार्थीले फारम भरे पनि ४ लाख ७२ हजार ७८ विद्यार्थीको मात्रै प्राप्ताङ्क प्राप्त भएको बोर्डले जनाएको छ ।

नतिजा https://www.neb.gov.np/results र https://see.ntc.net.np मा गएर हेर्न सकिने छ ।