चितवन मेडिकल कलेजलाई स्वाब परीक्षणको अनुमती, दैनिक १२ सयको परीक्षण गर्ने क्षमता

भरतपुर । चितवन मेडिकल कलेजलाई सरकारले कोरोना भाईरस (कोभिड १९) पत्ता लगाउन गरिने स्वाब परीक्षणको अनुमति दिएको छ । निजी क्षेत्रलाई पनि स्वाब परीक्षण गर्न दिने सरकारको नीति अनुसार कलेजलाई अनुमति दिईएको हो ।

कलेजले आईतबार एक विज्ञप्ति प्रकाशित गरी दैनिक एक हजार २०० जनाको परीक्षण गर्न सदिने र स्वाब लिएको ६ घण्टामा नै परिणाम दिन सकिने दावी गरेको छ । नेपाल सरकारले तोकेको निर्देशिका अनुसार स्वाब संकलन गरी सरकारले नै तोकेको ६ हजार ५० रुपैयाँ परीक्षण शुल्क लिने तयारी गरेको कलेजले कोभिड ल्याबको लागि जनशक्तिदेखि अन्य व्यवस्थापन अलग्गै गरेको जनाएको छ ।

विज्ञप्तिमा कलेजले राष्ट्रिय जनस्वास्थ्य प्रयोगशाला टेकु काठमाडौंबाट पीसीआर परीक्षण गर्ने अनुमति साउन ३० गते प्राप्त गरेको उल्लेख गरेको छ । कलेजले ल्याबका लागि आवश्यक सबै मापदण्ड पूरा गरेपछि प्रयोगशालाबाट अनुमति प्राप्त भएको जनाइएको छ ।

यस अघिनै पाँच करोड ४० लाख रुपैयाँको लगानीमा अत्याधुनिक प्रविधिसहित ल्याव तयार गरिसकेको र भदौ २ गतेबाट परीक्षण गरिने जनाईएको छ । मेडिकल ल्याव्रोटरी विभागीय प्रमुख डा. सञ्जय राय यादवको नेतृत्वमा ८ जना दक्ष प्राविधिकहरूको टोलीले तीन सिफ्टमा चांैविसैघण्टा ल्याव सञ्चालन गर्न कलेजले जनाएको छ ।