कोरोना संक्रमित बढेमा जिल्ला प्रशासन र स्थानीय तहले लकडाउन गर्न सक्ने सरकारको निर्णय

काठमाडौँ । कोरोना भाइरस संक्रमित संख्या वृद्धि भइरहे पनि संघीय सरकारले लकडाउन नगरी लकडाउनको जिम्मा सम्बन्धित जिल्ला प्रशासन कार्यालय र स्थानीय तहलाई दिएको छ । सरकारका प्रवक्ता युवराज खतिवडाले फेरि लकडाउन गर्ने तयारीमा सरकार नरहेको प्रष्ट्याउनु भएको हो ।

मन्त्रिपरिषद्ले गरेका निर्णय सार्वजनिक गर्दै मंगलबार मन्त्री खतिवडाले २०० बढी सक्रिय कोरोना संक्रमित भएका जिल्लामा प्रमुख जिल्ला अधिकारी र स्थानीय तहले लकडाउन गर्न सक्ने अधिकार दिईएको जानकारी दिनुभयो ।

उहाँले व्यवसाय गर्न र मालसामान ढुवानीमा पनि केन्द्र सरकारले रोक नलगाएको जानकारी दिनुभयो । “निश्चित ठाउँ जहाँ कोरोना जोखिम देखिन्छ त्यहाँ स्थानीय तहले प्रतिबन्ध लगाउन सक्छ। केन्द्र सरकारले फेरि लकडाउन गर्ने तयारी गरेको छैन” मन्त्री खतिवडाले भन्नुभयो ।