प्रधानमन्त्री र माडीका प्रतिनिधिबीच भेट, सांस्कृति अध्ययनसँगै विकास अगाडि बढाउने विषयमा छलफल

काठमाण्डौं । प्रधानमन्त्री केपी शर्मा ओली र माडी नगरपालिकाका जनप्रतिनिधिबीच शनिबार छलफल भएको छ । राम जन्मभूमि अयोध्याका विषयमा प्रधानमन्त्री ओलीले चासो दिनुभएसँगै छलफल भएको हो ।

राष्ट्रिय सभा सांसद दिलकुमारी रावल पार्वतीले अयोध्यापुरी नाम राख्नका लागि नगरपालिकाको वोर्डबाट निर्णय गरेर पठाउन प्रधानमन्त्रीले भन्नुभएको न्यूजभित्तोलाई जानकारी दिनुभयो । प्रधानमन्त्रीले रामनवमीका दिन अयोध्यापुरीमा मेला लगाउने तयारी गर्न समेत भन्नुभएको छ ।

माडीको सांस्कृतिक, ऐतिहासिक महत्वको अध्ययनसँगसँगै विकासको काम अगाडि बढाउन निर्देशन दिंदै प्रधानमन्त्री ओलीले स्थानीय सरकारले गर्ने यस्तो काममा संघीय सरकार साथमा रहेको बताउनुभयो ।

सो अवसरमा अयोध्यापुरीमा भएका संरचना र जग्गाको बारेमा प्रधानमन्त्रीले चासो व्यक्त गर्नुभएको थियो । निकुञ्जसंग सरकारले समन्वय गर्ने भन्दै उहाँले आवश्यक जग्गाको व्यवस्था गर्नुपर्ने बताउनुभयो । सो अवसरमा प्रधानमन्त्रीले राम नेपालमा जन्मेको र अयोध्याका प्रमाणहरु प्रशस्तै रहेको बताउनुभएको थियो ।

माडीमा भेटिएका पुरातात्विक र प्राचिन संरचनाहरुको संरक्षण गर्नुपर्नेभन्दै प्रधानमन्त्रीले पुरातत्व विभाग खोज, अनुसन्धान र उत्खननमा लागेको जानकारी दिनुभयो । उहाँले निकुञ्ज एेन संसोधनका विषयमा पनि काम अघि बढेको जानकारी दिनुभयो । प्रधानमन्त्रीले लुम्बिनी, वाल्मीकि आश्रम र जनकपुरधामलाई जोडेर धार्मिक सर्किट बनाउनुपर्ने धारणा राख्नुभयो । भेटमा सांसद रावल सहित माडी नगरपालिकाका प्रमुख ठाकुर ढकाल, उपप्रमुख ताराकाजी कुमारी महतो, नेकपा माडी नगर कमिटीका प्रतिनिधि, अयोध्या खोज अनुसन्धान तथा व्यवस्थापन समितिका पदाधिकारीहरु सहभागि हुनुहुथ्यो ।