विप्लव चितवनका इन्चार्ज सहित पाँच पक्राउ

चितवन । नेपाल कम्युनिष्ट पार्टी (विप्लव) समूहका जिल्ला इन्चार्ज सहित पाँच जनालाई प्रहरीले पक्राउ गरेको छ । राप्ती नगरपालिका वडा नं. ९ रसौलीबाट सोमबार साँझ ८ः३० बजेको समयमा उनीहरुलाई पक्राउ गरिएको हो ।

जिल्ला प्रहरी कार्यालय चितवनका सूचना अधिकारी डिएसपी सूर्यबहादुर थापाका अनुसार पक्राउ पर्नेहरुमा गुराँस गाउँपालिका वडा नंं ७ दैलेख निवासी विप्लव चितवन जिल्ला ईन्चार्ज लालबहादुर बिसी, राप्ती नगरपालिका वडा नं. ९ निवासी क्रान्तिकारी ट्रेड युनियन चितवन जिल्ला अध्यक्ष हुमबहादुर खड्का, उत्तर गंगा नगरपालिका वडा नं. ८ सुर्खेतका नेपाल दलित मुक्ति मोर्चाका महासचिव ४६ वर्षिय रामलाल विक रहेका छन् ।

यसैगरी भरतपुर महानगरपालिका वडा नं. २८ का ४४ वर्षिय भीमनारायण श्रेष्ठ र राप्ती नगरपालिका वडा नं. ९ निवासी २७ वर्षिय दानबहादुर श्रेष्ठलाई पनि प्रहरीले पक्राउ गरेको छ ।

उनीहरुलाई जिल्ला प्रहरी कार्यालय चितवनको नियन्त्रणमा राखी आवश्यक सोधपुछ र अनुसन्धान भईरहेको प्रहरीले जनाएको छ । गोप्य सूचनाका आधारमा उनीहरुलाई पक्राउ गरिएको थापाले बताउनुभयो ।