अन्तराष्ट्रिय सीमा आवागमन साउन ३२ सम्म रोक, सरकारी कार्यालय पूर्ववत् रुपमै

काठमाण्डौं । सरकारले अन्तर्राष्ट्रिय सिमानाबाट नेपाल प्रवेशमा लगाएको रोक कायमै राखेको छ । यसरी प्रवेश गर्ने सबै विन्दु र खुला सिमानाको जुनसुकै स्थानबाट हुनसक्ने यात्रुको आवागमन स्थगित गर्ने यसअघिको निर्णयलाई आगामी साउन ३२ सम्म कायमै राखिएको सरकारका प्रवक्ता अर्थ, सूचना तथा सञ्चार मन्त्री डा युवराज खतिवडाले बताउनुभयो । तर अत्यावश्यक सामग्रीको ढुवानी तथा असहज परिस्थितिमा स्वदेश आउनै पर्ने अवस्थामा व्यक्तिका लागि भने तोकिएको विन्दुबाट प्रवेशको व्यवस्था गरिनेछ ।

सरकारी कार्यालय पूर्ववत् रुपमै, गाडीको जोर/बिजोर प्रणाली हट्यो

मन्त्री खतिवडाले सिफ्टमा सञ्चालन गरेका सरकारी कार्यालय भने पूर्ववत् रुपमा सञ्चालन हुने जानकारी दिनुभयो । उहाँका अनुसार सरकारी कार्यालयहरु अब बिहान १० देखि साँझ ५ बजेसम्म सञ्चालन हुने छ ।

यसअघि सरकारले बिहान ८ देखि १ र १ देखि ५ बजेसम्म दुई सिफ्टमा कार्यालय सञ्चालन गर्ने निर्णय गरेको थियो । सरकारले सवारी साधनमा लगाउँदै आएको जोरबिजोर प्रणालीसमेत हटाएको डा खतिवडाले जानकारी दिनुभयो ।