नारायणगढ–मुग्लिन सडक खण्डको पहिरो हटाउन मुस्किल, पृथ्वी राजमार्ग पनि अवरुद्ध

चितवन । नारायणगढ–मुग्लिन सडक खण्डको चारकिलोमा सोमबार दिनभर पहिरो पन्छाउने काम सुरु हुन सकेको छैन । मंगलबार बिहानबाट मात्र मौषम अनुकुल भएमा पहिरो पन्छाउने काम थालिने भएको छ ।

नारायणगढ मु्ग्लिन सडक आयोजनाका इञ्जिनियर शिव खनालका अनुसार काम थाल्नै नसके पछि साँझबाट त्यहाँ भएका उपकरण र जनशक्ति पृथ्वी राजमार्गको पहिरो पन्छाउने काममा परिचालन गरिएको छ । चारकिलोमा ठूलो पहिरोसँगै साना पहिराहरु खसेका छन् । पहिरो पन्छाउन नपाउँदै माथिबाट थप पहिरो खस्ने समस्या भए पछि काम अघि वढ्न नसकेको हो ।

ईच्छाकामना गाउँपालिका वडा नम्बर ६ मा पर्ने सो ठाउँ नारायणगढबाट ३१ दशमलब ५ किलोमिटर दुरिमा पर्दछ । पहिरोले करिब ६० मिटर क्षेत्र ढाकेको छ । उक्त सडक खण्डका अन्य ठाउँमा पनि साना साना पहिरो खसेका छन् ।

यस्तै चितवन र धादिङको सिमानामा पर्ने पृथ्वी राजमार्गको मौवा खोला पुलको एप्रोच सडक बगाएको छ । खोलाले पुलसँग जोडिएको सडक बगाएपछि राजमार्ग पूर्ण रुपमा ठप्प छ । मौवा खोलाले सडक कटान गरेपछि पुलसमेत जोखिममा परेको छ ।

बाह्र मिटर पुलको एप्रोच सडकको भाग बाढीले बगाएको सडक डिभिजन कार्यालय भरतपुरका इञ्जिनीयर शिव खनालले जानकारी दिनुभयो । उहाँले जति सक्दो छिटो सडक मर्मत गरी यातायात सञ्चालनको प्रयास गरिने बताउनुभयो ।

मुग्लिन नौबीसे सडक खण्डको दर्जनौं ठाउँमा साना ठूला पहिरो खसेका छन् । जसका कारण उक्त सडक खण्ड पूर्ण रुपमा ठप्प छ । मंगलबार दिनभरी पनि पहिरो पन्छाउन लाग्न सक्ने अनुमान गरिएको छ ।