पहिरोले नारायणगढ–मुग्लिन सडकखण्ड अवरुद्ध, पन्छाउन दिनभर लाग्न सक्ने

चितवन । नारायणगढ–मुग्लिन सडक खण्ड पहिरोले अवरुद्ध भएको छ । सडकखण्डको चारकिलोमा आज सोमबार बिहान पहिरो खसेपछि सडक अवरुद्ध भएको छ । बिहान ५ बजेतिर दुई वटा विद्युत पोलसहित ठूलो पहिरो खसेको छ ।

पानी लगातार परिरहेको र माथिबाट समेत थप पहिरो खसिरहेकोले दिनैभर जस्तो सडक अवरुद्ध हुन सक्ने देखिएको नारायणगढ–मुग्लिन सडक आयोजनाका इञ्जिनियर शिव खनालले जानकारी दिनुभयो । आज यो सडक हुँदै यात्रा गर्नुहुने महानुभावहरुले बैकल्पिक सडक प्रयोग गर्न अनुरोध गरिएको उहाँले बताउनुभयो ।

दुई दिनदेखि यस क्षेत्रमा लगातार वर्षा भइरहेको छ । इच्छाकामना–६ मा पर्ने चारकिलोमा यस अघि पनि पटकपटक पहिरो खस्दा समस्या हुँदै आएको छ ।