माडी नगरपालिकाले शुरु ग-यो अयोध्याको तथ्यहरुको खोजी

माडी (चितवन) । अयोध्यापुरी रहेको माडी नगरपालिकाले तथ्यहरुको खोजी शुरु गरेको छ । प्रधानमन्त्री केपी शर्मा ओलीले सोमबार भगवान श्री राम नेपालकै र अयोध्या पनि नेपालमै भएको बताएपछि नगरपालिकाले तथ्यहरुको खोजी शुरु गरेको हो । यसै विषयलाई थप पुष्टि गर्न नगरपालिकाले तथ्यहरुको खोजी गर्ने अभियान थालेको छ ।

माडी नगरपालिकाका प्रमुख ठाकुर ढकालले राम र अयोध्यासँग जोडिएका ऐतिहासिक गुफा र मन्दिरहरु माडी नगरपालिकामा रहेकोले पनि आफूले तथ्यहरुको खोजीमा अग्रसरता लिएको बताउनुभयो। उहाँले देशभरका मिडियाहरुले तथ्यहरुको बारेमा सोधेकोले पनि आफू यसको खोजीमा लागेको बताउनुभयो । यस विषयमा इतिहासकार, पण्डित तथा अनुसन्धानकर्ताको वृहत् भेला राख्ने सोच बनाएको उहाँको भनाई छ ।

मेयर ढकालकै अग्रसरतामा मंगलबार माडी नगरपालिकामा पण्डितहरुको भेला पनि राखिएको थियो । भेलामा पाँच जना पण्डितहरु सहभागी हुनुहुन्थ्यो। सबैले आफ्ना तथ्यहरु प्रस्तुत गर्नुभयो । राम यसै क्षेत्र वरिपरी जन्मिएको भन्ने यथेष्ट प्रमाणहरु भेटिएको ढकालले बताउनुभयो ।

साबिकको अयोध्यापुरी गाउँ विकास समिति अहिलेको माडी नगरपालिकाको ८ र ९ नम्बर वाडमा पर्छ । क्षेत्र मार्फत् नभएर रामायणसँग जोडिएका धेरै तथ्यहरु रहेको नगर प्रमुख ढकालले बताउनुभयो । वाल्मीकि आश्रम, सीताराम गुफा, लवकुशको सन्दर्भ जोडिएका सबै स्थलहरु माडी क्षेत्रमा नै पर्छन् । यसअघि नै माडी नगरपालिकाले वार्षिक कार्यक्रममा धार्मिक पर्यटकीय क्षेत्रको विकासलाई राखेको छ ।