अवैध मृगौला प्रत्यारोपण गरेको आरोपमा पुरानो मेडिकल कलेजका ४ डाक्टरसहित ६ पक्राउ

चितवन । अवैध मृगौला प्रत्यारोपण गरेको आरोपमा कलेज अफ मेडिकल साईन्सेस शिक्षण अस्पताल (पुरानो मेडिकल कलेज) का ४ डाक्टर पक्राउ सहित ६ जना पक्राउ परेका छन् । मानव बेचबिखन अनुसन्धान ब्युरोको टोलीले शनिबार उनीहरुलाई पक्राउ गरेको हो ।

पक्राउ पर्नेमा अस्पतालको मृगौला रोग विभागका प्रमुख प्रा. डा.राकेश बर्मा, प्रा. डा. बालकृष्ण कालाखेती, डा. किरण अधिकारी र डा. सुप्रभात श्रेष्ठ छन् । डा. सुभात श्रेष्ठ कलेजका सीईओ र मेडिकल काउन्सिलका सदस्य पनि हुन् । यस्तै जिल्ला प्रशासन कार्यालय चितवनका शाखा अधिकृत रामचन्द्र ढकाल र अधिवक्ता रमेश काफ्ले पनि पक्राउ परेका छन् ।

कलेजमा एक वर्षअगाडि ललितपुरका एक व्यक्तिको मिर्गौला प्रत्यारोपण गरिएको थियो । भान्जा नाता प्रमाणित गरेर ल्याइएका एक युवकले उनलाई मिर्गौला दिएका थिए ।  उनीहरुलाई लामो समयको अनुसन्धापछि पक्राउ गरिएको जनाइएको छ । कलेजका संचालक भारतीय नागरिक भी नटराज र नगेन्द्र पम्पाटी हुन् ।