नेकपा स्थायी कमिटीको बैठक २४ गतेसम्मका लागि स्थगित

काठमाण्डौं । नेपाल कम्युनिष्ट पार्टी (नेकपा) को स्थायी कमिटीको बैठक स्थगित भएको छ । आज सोमबार बस्ने भनिएको बैठक नेताहरुबीच सहमति प्रयासका लागि भन्दै आगामी बुधबार (२४ गते) सम्मका लागि स्थगित गरिएको हो ।

प्रधानमन्त्रीका प्रेस सल्लाहकार सूर्य थापाका अनुसार अब स्थायी कमिटीको बैठक यही असार २४ गते ११ बजे बस्ने छ । यसबीचमा नेताहरुबीच सहमतिको प्रयास जारी रहने छ । यसअघि पनि दुई दिनसम्म स्थायी कमिटी बैठक स्थगित गरेर सहमति प्रयास गरिएको थियो ।

स्थायी कमिटीका अधिकांश सदस्यहरुले प्रधानमन्त्री केपी शर्मा ओलीको राजीनामा मागेपछि नेकपाभित्र आन्तरिक कलह चुलिएको छ । प्रचण्ड–माधव नेपाल पक्षले प्रधानमन्त्री र पार्टी अध्यक्ष दुवै पद छाड्न ओलीलाई दबाव दिएका छन् । तर प्रधानमन्त्री ओली भने दुवै पद नछाड्ने अडानमा हुनुहुन्छ । नेपालको कालापानी सहितको भूभाग नेपालको नक्सामा समेटेपछि देशी विदेशी शक्ति आफूलाई पदबाट हटाउन लागिपरेको प्रधानमन्त्रीको बुझाई छ । पार्टीलाई फुटबाट जोगाउन छलफलहरु जारी रहेको भए पनि निष्कर्षमा पुग्न सकेको छैन ।