चितवनमा दुई चिकित्सक, एक स्वास्थ्यकर्मी सहित २३ जनामा कोरोना संक्रमण

चितवन । भरतपुर अस्पताल मातहत रहेको भरतपुर कोभिड १९ प्रयोगशालामा गरिएको स्वाब परीक्षणको क्रममा दुई जना चिकित्सक र एक जना स्वास्थ्यकर्मी सहित २३ जनामा कोरोना संक्रमण पुष्टि भएको छ । शुक्रबार र शनिबार संकलन गरिएका ३ सय १० नमूना परीक्षण गरिएकोमा सोमबार आएको नतिजामा २३ जनामा कोरोना पोजेटिभ देखिएको हो ।

भरतपुर अस्पतालले सोमबार प्रेस वक्तव्य जारी गर्दै पोजेटिभ देखिएकामा एक निजी अस्पतालका चिकित्सक रहेका छन् । त्यसै गरी भरतपुर अस्पतालबाट स्वाब संकलन गरेका बाहिर कार्यरत एक जना चिकित्सक र एक जना महिला स्वास्थ्यकर्मी रहेका छन् ।

भरतपुर अस्पतालका प्रमुख मेडिकल सुपरिटेण्डेन्ट डा. श्रीराम तिवारीले माडी नगरपालिकाको क्वारेन्टिनमा बस्दै आएका ६ जना, भरतपुर महानगरपालिकाको क्वारेन्टिनमा बस्दै आएका ४ जना, नारायणी सामुदायिक अस्पतालमा उपचाररत १ जना, पुरानो मेडिकल कलेजमा उपचाररत २ जना, बिपी कोईराला मेमोरियल क्यान्सर अस्पतालमा उपचाररत १ जना रहेका छन् ।

त्यसै गरी पूर्वी नवलपरासी (नवलपुर) का ५ जना र धादिङ्को १ जनामा कोरोना पुष्टि भएको हो ।

माडी र भरतपुर महानगरपालिकामा भेटिएका संक्रमितहरु भारतबाट आएर क्वारेन्टिनमा बस्दै आएका हुन् । अस्पतालमा भएकाहरु मध्ये नारायणी सामुदायीक अस्पतालको सघन उपचार कक्षमा रहेका एक जनाको अवस्था गम्भीर रहेको छ ।

भरतपुर अस्पतालका डा. प्रमोद पौडेलका अनुसार सो भरतपुर अस्पताल र भरतपुर कोरोना (अस्थाई) अस्पतालमा उपचाररत ६ जनाको सोमबार गरिएको पुनः परीक्षणमा पोजेटिभ देखिएको छ ।

अस्पतालमा उपचाररत कोरोना बाहेकका बिरामी र चिकित्सकमा समेत कोरोना पोजेटिभ देखिएसँग यहाँको समुदायमा अरु सजगता अपनाउनु पर्ने चिकित्सकहरुले सुझाएका छन् ।