कामना सेवा विकास बैंकले दियो ४४ विपन्न घरधुरीलाई राहत सामग्री

चितवन । कोरोना भाईरस (कोभिड १९) का कारण भएको लकडाउनले अप्ठ्यारोमा परेका परिवारलाई कामना सेवा विकास बैंकले राहत सामग्री सहयोग गरेको छ । भरतपुर महानगरपालिका वडा नम्बर ५ स्थित विकास चोकमा रहेको कामना सेवा विकास बैंकको शाखाले शुक्रबार ४४ घर परिवारलाई राहत वितरण गरेको छ । बैंकले ती घरधुरीलाई १५ दिनलाई पुग्ने खाद्य सामाग्री वितरण गरेको हो ।

लकडाउनका कारण सबैभन्दा बढी ज्यालामजदुर र विपन्न वर्ग मारमा परेको कारण राहत सामाग्री वितरण गरिएको बैंकले जानकारी दिएको छ । न्यून आय भएका तथा दैनिक ज्यालादारीमा काम गर्ने ४४ घर परिवारलाई दैनिक उपभोग्य खाध्यान्न तथा अन्य सामग्री वितरण गरिएको बैंकका शाखा प्रबन्धक रामप्रसाद लोहागुनले जानकारी दिनुभयो।

उहाँका अनुसार उनीहरुलाई १५ दिनलाई पुग्ने चामल, तेल, नुन र साबुन वितरण गरिएको हो । उक्त राहत महानगरपालिका को वडा नम्बर ५ , विकासचोक टोल विकास संस्था र विकासचोक बजार समितिको सहकार्यमा वितरण गरिएको प्रबन्धक लोहागुनले जानकारी दिनुभयो ।

वितरण कार्यक्रममा बैंकका क्षेत्रीय प्रबन्धक सुरेन्द्र भण्डारी, वडा सदस्य रबिलाल भट्टराई, टोल विकास संस्थाका अध्यक्ष केशवराज पोखरेल, बजार समितिका अध्यक्ष दिपक श्रेष्ठ लगायतको सहभागिता थियो । बैंकले लकडाउन शुरुभएपछि टांँडीको खुरखुरे , नारायणढको लायन्स चोक, शारदानगर, हाकीमचोकमा रहेका शाखाहरुबाट समेत राहत सामग्री वितरण गरिसकेको छ