बजेटमा यी योजनाहरु पायो चितवनले

चितवन । अर्थमन्त्री डा. युवराज खतिवडाले बिहीबार संसदमा प्रस्तुत गर्नुभएको आर्थिक वर्ष २०७७/०७८ को बजेटमा चितवनले धेरै योजना हात पारेको छ । केन्द्रीय योजनाबाट चितवनले विमानस्थल, अस्पताल, सडक, औद्योगिक क्षेत्र लगायतमा बजेट पाएको हो ।

प्रस्तुत बजेटमा भरतपुर विमानस्थललाई प्रादेशिक विमानस्थल बनाउने उल्लेख छ । यस्तै भरतपुर अस्पताल पाँच सय शैयाको विशेषज्ञ अस्पताल बन्ने भएको छ । चितवनको विद्युतीकरणलाई भूमिगत गर्ने विषय पनि बजेटमा समेटिएको छ । धार्मिक पर्यटकीय स्थल देवघाट जोड्ने सडक बजेटमा समेटिएको छ भने औद्योगिक क्षेत्र, रंगशाला लगायतका शीर्षकमा पनि चितवनले बजेट पाएको छ । बजेटमा घोषणा नगरिएका तर रातो किताबमा समेटिएका अन्य थुप्रै योजना चितवनमा परेको बताईएको छ ।