चितवनमा भेटिए अर्का कोरोना सङ्क्रमित, थपिए ३२ जना, कूल सङ्क्रमित ५४८

चितवन । हिजो मात्र दुई कोरोनाभाइरस (कोभिड–१९) सङ्क्रमित पुष्टि भएका चितवनमा आज फेरि एकजना सङ्क्रमित भेटिएका छन् । स्वास्थ्य तथा जनसङ्ख्या मन्त्रालयका अनुसार भरतपुर अस्पतालको कोभिड–१९ प्रयोगशालामा गरिएको परीक्षणमा भरतपुर महानगरपालिका वडा नम्वर–६का ५२ वर्षीय एक पुरुषमा कोरोना सङ्क्रमण पुष्टि भएको छ ।

कपिलवस्तु, सर्लाही, बारा, रुपन्देही, काठमाडौँ र चितवनका गरी ३२ जना कोरोना सङ्क्रमित थपिएका र योसँगै नेपालमा सङ्क्रमितको सङ्ख्या पाँच सय ४८ पुगेको मन्त्रालयका सहप्रवक्ता डा. समीरकुमार अधिकारीले जानकारी दिनुभएको छ ।

मन्त्रालयका अनुसार आज नयाँ पुष्टि भएकाहरुमा कपिलवस्तुको वाणगङ्गा नगरपालिकाका सात पुरुष र एक महिला गरी आठ जना, सर्लाहीको गोडैता र कविलासी नगरपालिकाका १३ जना पुरुष, बाराको करैयामाई गाउँपालिकाकी एक महिला, काठमाडौँका एक पुरुष, रुपन्देहीको गैडहवा र रोहिणी गाउँपालिकाका आठ जना पुरुष तथा चितवनको भरतपुर–६ का एक पुरुष रहेका छन् ।

उनीहरुमध्ये कपिलवस्तु, सर्लाही, बारा र काठमाडौँका सङ्क्रमितको राष्ट्रिय जनस्वास्थ्य प्रयोगशाला काठमाडौँ, रुपन्देहीका सङ्क्रमितको प्रादेशिक जनस्वास्थ्य प्रयोगशाला भैरहवा र चितवनका सङ्क्रमितको भरतपुर अस्पतालको कोभिड–१९ प्रयोगशालामा परीक्षण गरिएको मन्त्रालयका सहप्रवक्ता डा. अधिकारीले जानकारी दिनुभएको छ । आज सङ्क्रमण पुष्टि भएकाहरु १७ वर्षदेखि ५५ वर्ष उमेर समूहका रहेका छन् ।