दिल्लीबाट एम्बुलेन्स फेर्दै आएका थिए चितवनका संक्रमित, घरमै क्वारेन्टाइनमा बसेका थिए

गीतानगर (चितवन) । चितवनको गीतानगरमा भेटिएका दुई जना संक्रमित भारतको दिल्लीबाट दुई वटा एम्बुलेन्स प्रयोग गर्दै नेपाल आएको पाईएको छ । दिल्लीबाट नेपालको सीमा कृष्णनगरसम्म एउटा एम्बुलेन्स र त्यहाँबाट अर्काे एम्बुलेन्समा उनीहरु आएका हुन् ।

भरतपुर महानगरपालिकाको स्वास्थ्य शाखा प्रमुख दिपक सुवेदीका अनुसार उनीहरु जेठ ३ गते यहाँ आईपुगेका थिए । भरतपुर कोभिड–१९ प्रयोगशालामा बिहीबार कोरोना भाइरस पोजेटिभ देखिएका उनीहरुलाई राती २ बजे भरतपुर कोरोना विशेष (अस्थायी) अस्पताल ल्याइएको छ । सो प्रयोगशालामा बिहीबार परीक्षण भएका १३१ जनामध्ये चितवनका दुई र नवलपरासीका एकजनामा पिसिआर परीक्षण पोजेटिभ देखिएको थियो ।

भरतपुर महानगरपालिका वडा नं.६ केशरबागका वृद्ध दम्पत्तीमा पोजेटिभ देखिएको हो । सुवेदीका अनुसार ७४ वर्षीय वृद्ध र ७३ वर्षीया वृद्धामा पोजेटिभ देखिएको छ । उनीहरुसँगै फर्किएका जेठा छोराको भने परीक्षण नेगेटिभ देखिएको छ । वृद्ध वृद्धा र सँगै फर्किएका छोरा पनि अस्पताल आएका छन् ।

बृद्ध दम्पत्ती र छोरा गत चैत २ गते उपचारको लागि दिल्ली गएको उनका कान्छा छोरालाई उदृत गर्दै सुवेदीले जानकारी दिनुभयो । बृद्ध (बुबा) को क्यान्सरको उपचार गर्न उनीहरु दिल्ली गएका थिए । दिल्लीको राजीवगान्धी अस्पतालमा उनलाई तेस्रो साईकलको केमो चढाईएको बताईएको छ ।

दिल्लीबाट फर्किएपछि उनीहरु घरको माथिल्लो तल्लामा क्वारेन्टाइनको नियम पालन गर्दै बसेका थिए । दुई छोरा, दुई बुहारी र दुई नातिनातिना समेत ८ जनाको परिवार रहेको भए पनि दिल्लीबाट फर्किएका तीनै जना अलग्गै बस्दै आएको पाईएको सुवेदीले जानकारी दिनुभयो । सुवेदीले भन्नुभयो “उनीहरु आफैलाई शंका लागेर क्वारेन्टाइनको नियम पालन गरेको देखियो ।” क्न्ट्याक्ट ट्रेसिङमा खटिनु भएका सुवेदीका अनुसार उनीहरु बिहीबार आफै परीक्षण गर्न भरतपुरस्थित ल्याब आएका थिए ।

स्थानीयहरुले पनि उनीहरु दिल्लीबाट आएपछि घरबाट बाहिर ननिस्केको बताएका छन् । घर नजिकै एउटा घर भए पनि अन्य घर भने धेरै टाढा टाढा रहेका छन् । प्रमुख जिल्ला अधिकारी नारायणप्रसाद भट्टराईले संक्रमित देखिएको टोललाई शिल गरेर कन्ट्याक ट्रेसिङको काम भईरहेको बताउनुभयो ।

यस्तै नवलपरासीका संक्रमितलाई बिहानै सो अस्पताल ल्याइएको छ । भरतपुर अस्पतालका मेडिकल सुपरिटेण्डेण्ट डा. श्रीराम तिवारीका अनुसार ४५ वर्षीय ती पुरुष विनय त्रिवेणी नगरपालिका वडा नं ६ का हुन् । उनी जेठ १ गते भारतको गुजरातबाट आएका थिए । आएलगत्तै उनलाई पश्चिम नवलपरासीको क्वारेन्टिनमा राखिएको थियो । उनी जेठ ६ गतेदेखि आफ्नै वडाको क्वारेन्टिनमा बसेका थिए । जेठ ७ गते बेलुका ज्वरो आएपछि उनीलाई उपचारका लागि चोरमारा स्वास्थ्य केन्द्रमा ल्याईएको थियो । पोजेटिभ देखिएलगत्तै उनलाई भरतपुर कोरोना अस्पताल ल्याईएको हो ।

संक्रमण देखिएका तीन जना र यसअघिका नवलपरासीबाटै ल्याईएका एक गरी चारैजनाको स्वास्थ्य अवस्था सामान्य रहेको डा. तिवारीले जानकारी दिनुभयो ।

यस अघि राप्ती नगरपालिकाका दुई जना आमा छोरामा कोरोना संक्रमण भएपछि भरतपुर अस्पतालमा उपचारगरी निको भएर घर फर्किसकेका छन् ।