दुई प्रहरीमा कोरोना भेटिएपछि कालिमाटी प्रहरी वृत्त सिल

काडमाडौँ । महानगरीय प्रहरी वृत्त, कालीमाटीमा कार्यरत दुई जना प्रहरीमा कोरोनाभाइरस (कोभिड–१९)को सङ्क्रमण पुष्टि भएपछि प्रहरीको कालीमाटी वृत्त सिल गरिएको छ ।

महानगरीय प्रहरी वृत्त कालीमाटीका प्रमुख रुगम कुँवरले कालीमाटीस्थित वृत्त परिसरमै रहेका प्रहरी प्रभाग र महिला सेललाई पनि सिल गरिएको बताउनुभयो । राष्ट्रिय जनस्वास्थ्य प्रयोगशालाले गरेको परीक्षणमा मङ्गलबार एक जना प्रहरी नायव निरीक्षक (सइ) र एक जवानमा कोरोना सङ्क्रमण देखिएको थियो ।

हाल कालीमाटी वृत्त परिसरमै महिला तथा बालबालिका सेल र ट्राफिक वृत्त पनि रहेको र उनीहरूको खाने बस्ने एकै स्थानमा रहेको बताइएको छ । त्यहाँ करिब दुई सय प्रहरी कार्यरत छन् । सङ्क्रमण देखिएका दुई जना कालीमाटी क्षेत्रमा सादा पोसाकमा काम गर्ने (घुमुवा) प्रहरी भएको बताइएको छ ।

स्वास्थ्य मत्रालयको टोलीले त्यहाँ कार्यरत सबैको स्वाबको नमुना लिने तयारी गरेको छ । अहिले कालीमाटी क्षेत्र आसपासको सुरक्षामा अन्य वृत्तबाट प्रहरी परिचाल गरिएको छ ।