थप २७ जनामा कोरोना सङ्क्रमण, सङ्क्रमित सङ्ख्या चार सय नाघ्यो

काठमाडौँ । कोभिड–१९ को सङ्क्रमण आज २७ जनामा देखिएको छ । स्वास्थ्य तथा जनसङ्ख्या मन्त्रालयका प्रवक्ता डा विकास देवकोटाले आज विभिन्न ठाउँमा गरिएको स्वास्थ्य परीक्षणमा विभिन्न १३ जिल्लाका मानिसमा सङ्क्रमण देखिएको जानकारी दिनुभयो ।

उहाँका अनुसार झापाका नौ, मोरङका एक, सुनसरीका एक, सर्लाहीका दुई, मकवानपुरका एक, भक्तपुरका एक, काठमाडौँका तीन, ललितपुरका एक, सिन्धुलीका एक, कपिलवस्तुका चार, नवलपरासीका एक, रामेछापका एक र लमजुङका एकजनामा कोरोना सङ्क्रमण देखिएको हो ।

आज २७ जना थपिएपछि सङ्क्रमितको सङ्ख्या ४०२ पुगेको छ । यसैगरी ३६ जिल्लामा सङ्क्रमण देखिएको उहाँले बताउनुभयो । आज देखिएका सङ्क्रमितमा २४ पुरुष र तीन महिला छन् ।

प्रवक्ता डा देवकोटाले सङ्क्रमितको हाल रहेको र स्थायी ठेगानाअनुसार कन्ट्याक्ट ट्रेसिङ इपिडिमियोलोजी तथा सरुवा रोग नियन्त्रण महाशाखाले गरिरहेको बताउनुभयो । उहाँले आज कोशी अस्पतालबाट एकजना थप स्वस्थ भई घर फर्किनुभएको जानकारी दिनुभयो । यसरी स्वस्थ भई घर फर्कनेको सङ्ख्या ३७ पुगेको छ ।