थप १८ जनामा कोरोनाभाइरस सङ्क्रमण, सङ्क्रमित सङ्ख्या ३७५ पुग्यो

काठमाडौँ । थप १८ जनामा कोरोनाभाइरस (कोभिड–१९) पुष्टि भएको छ । स्वास्थ्य तथा जनसङ्ख्या मन्त्रालयले आज राति सवा दश बजे थप १८ जना कोरोना सङ्क्रमित थपिएसँगै कूल सङ्क्रमित सङ्ख्या तीन सय ७५ पुगेको जनाएको छ ।

मन्त्रालयका सहप्रवक्ता डा. समीरकुमार अधिकारीले प्रेस विज्ञप्ति जारी गरी बाँकेको नरैनापुरका १२ जना, धनुषाका दुई जना तथा खोटाङको हलेसी, दैलेखको आठबिस–१, सुनसरी र झापाका एक/एक जनामा कोरोना पुष्टि भएको जानकारी दिनुभएको छ । नयाँ सङ्क्रमित सबै पुरुष रहेका छन् ।

राष्ट्रिय जनस्वास्थ्य प्रयोगशाला काठमाडौँ, बीपी कोइराला स्वास्थ्य विज्ञान प्रतिष्ठान धरान, भेरी अस्पताल नेपालगञ्ज र कोशी अस्पताल विराटनगरमा गरिएको परीक्षणमा उनीहरुमा कोरोनाभाइरस पुष्टि भएको डा. अधिकारीले बताउनुभयो । हालसम्म प्राप्त विवरणअनुसार उनीहरुको स्वास्थ्य अवस्था सामान्य रहेको र स्वास्थ्यकर्मीको सम्पर्कमा रहेका पनि डा. अधिकारीले बताउनुभएको छ ।