लकडाउन : पन्ध्र दिन थपियो, जेठ २० सम्म

काठमाडौँ । सरकारले जारी लकडाउन पन्ध्र दिन थप गर्ने निर्णय गरेको छ। प्रधानमन्त्री निवास बालुवाटारमा आज साँझ बसेको मन्त्रिपरिषद् बैठकले लकडाउनको समय यही जेठ २० गतेसम्म लम्ब्याउने निर्णय गरेको हो । बिश्वभर महामारीको रुपमा फैलिएको कोरोना भाइरसबाट नागरिकलाई बचाउन सरकारले यस्तो निर्णय गरेको हो ।

सरकारले पहिलोपटक चैत ११ देखि १८ गतेसम्म लकडाउन गरेको थियो। त्यसपछि फेरि दोस्रोपटक एक हप्ता थपेर चैत २५ सम्मका लागि लम्ब्याइएको थियो। त्यसलाई निरन्तरता दिँदै वैशाख ३, त्यसपछि १२ दिन लकडाउनको अवधि थपेर वैशाख १५ र १० दिन थप गर्दै बैशाख २५ र पछिल्लो पटक जेठ ५ गतेसम्म लकडाउनको अवधि थप गरेको थियो।

पछिल्लो २४ घण्टामा कोरोनाबाट दुई जनाको मृत्यु भएपछि सरकारले लकडाउनको अवधी १५ दिन थप गरेको हो । नेपालमा हालसम्म कोरोना सङ्क्रमितको संख्या २९५ पुगेको छ। दुई जनाको कोरोनाकै कारण मृत्यु भएको छ भने ३६ जना निको भएका छन्।

आजै दिउँसो बसेको कोरोना भाइरस (कोभिड १९) रोकथाम तथा नियन्त्रण उच्च स्तरीय समितिको बैठकले लकडाउनको अवधि लम्ब्याउन सिफारिस गरेको थियो। सोही सिफारिशका आधारमा १५ दिनको समय थप गरिएको हो । बैठकले कोरोना सङ्क्रमणको जोखिम बढ्दो रहेको निष्कर्ष निकाल्दै लकडाउनलाई लम्ब्याउन सिफारिस गर्ने निर्णय गरेअनुसार मन्त्रिपरिषद बैठकले जेठ २० गतेसम्म लकडाउनको समय थप गरेको हो ।