नेपालमा कोरोना सङ्क्रमितको सङ्ख्या २७३ पुग्यो, चितवनका एक जनामा पनि देखियो सङ्क्रमण

काठमाडौँ । नेपालमा कोरोनाभाइरस (कोभिड–१९) सङ्क्रमितको सङ्ख्या दुई सय ७३ पुगेको छ । स्वास्थ्य तथा जनसङ्ख्या मन्त्रालयले आज विहान १० बजे प्रेस विज्ञप्ति जारी गरी राष्ट्रिय जनस्वास्थ्य प्रयोगशाला, काठमाडौँमा गरिएको परीक्षणमा थप छ जनामा कोरोनाभाइरस सङ्क्रमण पुष्टि भएको र कूल सङ्क्रमित सङ्ख्या दुई सय ७३ पुगेको जनाएको छ ।

मन्त्रालयका सहप्रवक्ता डा. समीरकुमार अधिकारीका अनुसार नयाँ सङ्क्रमण पुष्टि हुनेमा चितवनको राप्ती नगरपालिका–१, गढौलीकि २५ वर्षीया महिला, बर्दियाको नार्खु–११ कि २८ वर्षीया महिला, सिरहाको सखुवा–१९ का ३० वर्षीय पुरुष, पर्साको वीरगञ्ज–१२ का २८ र २९ वर्षीय पुरुष र सर्लाहीको रामनगर–४ कि १८ वर्षीया महिला रहेका छन् । उनीहरुको स्वास्थ्य अवस्था सामान्य रहेको र स्वास्थ्यकर्मीको सम्पर्कमा रहेका पनि डा. अधिकारीले बताउनुभएको छ ।