कालापानी, लिपुलेक र लिम्पियाधुरासहितको नेपालको नयाँ नक्सा जारी गरिने

काठमाडौँ । राष्ट्रपति विद्यादेवी भण्डारीले कालापानी, लिपुलेक र लिम्पियाधुरा नेपाली भूमि भएकोले उक्त भूमिलाई समेटेर नेपालको नयाँ नक्सा जारी गरिने बताउनुभएको छ ।

सङ्घीय संसद्को दुवै सदनको संयुक्त बैठकमा आज आगामी आर्थिक वर्षका लागि नेपाल सरकारको नीति तथा कार्यक्रम प्रस्तुत गर्दै राष्ट्रपति भण्डारीले नेपालको नक्सामा समावेश गर्न छुटेको सीमाको भूभागलाई समेटेर नयाँ नक्सा सार्वजनिक गरिने बताउनुभयो ।

राष्ट्रपति भण्डारीले सीमा समस्या समाधानका लागि ठोस पहल भइरहेको पनि बताउनुभयो । उहाँले सीमा व्यवस्थापन गर्न थप बोर्डर आउट पोष्ट (बीओपी) स्थापना गरिनेसमेत बताउनुभयो ।