पूर्व राजा ज्ञानेन्द्रलाई मिल्यो पास, झापाबाट काठमाण्डौंतर्फ प्रस्थान

झापा । पूर्वराजा ज्ञानेन्द्र शाहले झापाबाट काठमाडौं आउने पास पाउनु भएको छ । उहाँ दमकमा रहेको हिमालय महालक्ष्मी चिया बगानमा रहेको निवासबाट शुक्रबार बिहान सवारी साधन पास लिएर काठमाण्डौ फिर्ता हुनुभएको हो ।

कोभिड –१९ को रोकथामका लागि सरकारले चैत ११ गते लकडाउन लागू गर्नुअघिदेखि उहाँ झापामा रहनुभएको थियो । प्रमुख जिल्ला अधिकारी उदयबहादुर रानाले पूर्वराजा ज्ञानेन्द्र, पूर्वरानी कोमल शाहसमेत पाँच जनाको सवारी पास जारी गरिएको बताउनुभयो ।

पूर्वराजा शाहका तर्फबाट उहाँको सचिवालयले काठमाण्डौ जानका बिहीबार झापा जिल्ला प्रशासन कार्यालयमा सवारी पासका लागि इमेलबाट निवेदन पठाएको थियो । अन्तरजिल्ला सवारी पासका लागि जिल्ला प्रशासन कार्यालयले गृह मन्त्रालयलमा निवेदन पठाएपछि मन्त्रालयले स्वीकृति प्रदान गरेको प्रजिअ रानाले जानकारी दिनुभयो ।

पूर्वराजाका सहयोगीले इमेलमार्फत सवारी पास लिन निवेदन दिएपछि प्रशासन कार्यालयले पास दिएको थियो । तर गृह मन्त्रालयको स्वीकृति नलिई सवारी पास दिन नपाइने भएपछि प्रशासन कार्यालयले उक्त पास रद्ध गरेको थियो । पुनः गृह मन्त्रालयको अनुमति लिएर बिहीबारै पास उपलब्ध गराईएको प्रजिअ रानाले जानकारी दिनुभयो ।