पहुँचका आधारमा पिसिआर परीक्षणको माग बढ्दै, वैज्ञानिक निर्देशन अनुरुप मात्रै गरिने

चितवन । सामाजिक पहुँचका आधारमा जथाभावी रुपमा कोभिड–१९को पिसिआर परीक्षणको माग र सिफारिस हुन थालेपछि यहाँको कोरोना प्रयोगशालामा पछिल्लो वैज्ञानिक निर्देशन अनुरुप मात्र परीक्षण गर्ने निर्णय गरिएको छ । भरतपुर अस्पतालले पिसिआर प्रयोगशाला सञ्चालन गर्दै आएको छ ।

अस्पताल विकास समितिका अध्यक्ष डा. भोजराज अधिकारीको अध्यक्षतामा आज यहाँ सम्पन्न चितवन र नवलपुरका स्वास्थ्य कार्यालयका प्रमुख, अस्पताल एवम् मेडिकल कलेज प्रमुख र सरोकारवालाहरुको बैठकले पछिल्लो वैज्ञानिक निर्देशनलाई पूर्ण पालना गर्दै परीक्षण गर्ने निर्णय गरेको हो । अधिकारीका अनुसार परीक्षणको गुणस्तरमा उच्च ध्यान दिँदै स्वास्थ्य कार्यालय र निजी अस्पतालहरुले विश्व स्वास्थ्य संगठनको निर्देशन अनुसार आवश्यक पर्नेलाई मात्र परीक्षण गर्न सिफारिस गर्न र सोही अनुसार व्यवस्थापन मिलाउने निर्णय भएको छ ।

सो अवसरमा सबैलाई पछिल्लो निर्देशिका समेत वितरण गरिएको थियो । बैठकले शंकास्पद व्यक्तिको नमुना संकलन सम्बन्धित अस्पतालहरु आफैले गरि पठाउने र परीक्षणमा आवश्यक पर्ने भाईरल ट्रान्सफर मिडिया सरकारी तवरमा उपलव्ध नभएमा आफैले व्यवस्था गर्ने निर्णय गरेको छ । उहाँका अनुसार शल्यक्रिया गर्नुपर्ने बिरामीलाई ज्वरो आई कोरोनाको लक्ष्यणहरु देखिए मात्र स्वाब परीक्षण गर्न पठाउने निर्णय गरिएको छ ।

पछिल्लो समय निर्देशिका अनुसार आवश्यक नपर्नेहरुले परीक्षणका लागि दबाब दिने क्रम बढेपछि आवश्यक पर्नेका लागि मात्र परीक्षण गर्ने निर्णय गरिएको हो । अस्पतालका सूचना अधिकारी लिलाधर पौडेलका अनुसार बैठकमा चितवन र नवलपुरका जनस्वास्थ्य कार्यालयका प्रमुख, विपि कोईराला मेमोरियल क्यान्सर अस्पतालका कार्यकारी दिर्नेशक, चितवनका दुवै मेडिकल कलेजका प्रमुख एवम् प्रतिनिधिलगायतको उपस्थिति रहेको थियो । भरतपुर अस्पतालले सञ्चालन गरेको प्रयोगशालामा चितवन र नवलपुरका कोरोना आशंका गरिएकाहरुको स्वाब परीक्षण गरिदै आएको छ ।