सत्तारुढ नेकपाको स्थायी कमिटी बैठक स्थगित

काठमाडौँ । नेपाल कम्युनिष्ट पार्टी (नेकपा) का एकजना स्थायी कमिटी सदस्यको सुरक्षामा खटिएका सुरक्षाकर्मीलाई कोरोना सङ्क्रमण भएपछि आजका लागि बोलाइएको पार्टीको स्थायी कमिटी बैठक स्थगित भएको छ । आज बिहान ११ बजेका लाग बोलाइएको स्थायी कमिटी बैठक स्वास्थ्य सुरक्षा लगायतका कारण स्थगित भएको बताइएको छ ।

स्थायी कमिटीका सदस्य डा. भीमबहादुर रावलको सुरक्षामा खटिएका एक जना सशस्त्र प्रहरीमा कोरोना संक्रमण देखिएपछि अध्यक्षद्वय केपी शर्मा ओली र पुष्पकमल दाहाल ‘प्रचण्ड’ले अनिश्चित कालका लागि बैठक स्थगित गर्नुभएको हो । देशका विभिन्न स्थानबाट स्थायी कमिटी सदस्यहरु आउने तथा उनीहरुको स्वास्थ्य परीक्षण नगरिएको तथा काठमाडौँ लगायतका स्थानमा कोरोना संक्रमितको संख्या बढेपछि स्थायी कमिटी स्थगित गरिएको नेकपाले जनाएको छ ।

नेकपाको आजको स्थायी कमिटी बैठकमा सरकारको नीति तथा कार्यक्रम र बजेट, सरकारले चालेको कोरोना विरुद्धको अभियानको समिक्षा र भारतीय अतिक्रमणकारी नीति विरुद्ध प्रस्ताव पारित गर्ने तयारी गरिएको भएपनि स्वास्थ्य सुरक्षाका कारण स्थगित गरिएको हो । भारतले हालै नेपाली भूमि लिपुलेक, कालापानी, लिम्पियाधुरा क्षेत्र हुँदै चीनको मानसरोबार जोड्ने सडकको उद्घाटन गरेको थियो । नेपाली पक्षसँग समन्वय तथा अनुमति नलिईकन भारतले नेपाली भूमिमा समेत सडक बनाएपछि यसको चौतर्फी विरोध भईरहेको छ ।