मङ्गलबार ८३ जनामा कोरोना पुष्टि, पर्साका मात्रै ५७ जना, सङ्क्रमित सङ्ख्या २१७ पुग्यो

काठमाडौँ । मङ्गलबार एकै दिन ८३ जनामा कोरोनाभाइरस (कोभिड–१९) सङ्क्रमण पुष्टि भएको छ । राष्ट्रिय जनस्वास्थ्य प्रयोगशाला काठमाडौँमा गरिएको परीक्षणमा उनीहरुमा कोरोना सङ्क्रमण भेटिएको हो । योसँगै नेपालमा कोरोना सङ्क्रमितको सङ्ख्या दुई सय १७ पुगेको छ ।

स्वास्थ्य तथा जनसङ्ख्या मन्त्रालयले दिउँसो १ः१०मा जारी गरेको प्रेस विज्ञप्तिमा ५७ जना र बेलुकी १०ः१५ मा जारी गरेको प्रेस विज्ञप्तिमा २६ जनामा सङ्क्रमण पुष्टि भएको जानकारी गराएको हो । मङ्गलबार पुष्टि भएका सङ्क्रमित मध्ये पर्सा जिल्लाका मात्रै ५७ जना रहेका छन् ।

मन्त्रालयका सह–प्रवक्ता डा. समीरकुमार अधिकारीका अनुसार बेलुकी सङ्क्रमण पुष्टि हुने २६ जनामा पर्सा जिल्लाका १८ जना रहेका छन् । जसमध्ये छ जना महिला र १२ जना पुरुष रहेका छन् । महिलाहरु २२, २८, २८, ३२, ४५ र ६० वर्ष उमेरका छन् भने पुरुषहरु १६, २२, २४, २५, २५, २८, २८, ३२, ५९, ५५, ६१ र ६१ वर्षका रहेका छन् ।

त्यसैगरी, महोत्तरीका १६ र ३५ वर्षीय पुरुषहरु, धनुषाका २० वर्षीय महिला र ४० वर्षीय पुरुष, भक्तपुरका २५ वर्षीय महिला र २७ वर्षीय पुरुष, काठमाडौँका ३३ वर्षीय महिला र सर्लाहीका ४५ वर्षीय पुरुष रहेका मन्त्रालयका सह–प्रवक्ता डा. अधिकारीले जानकारी दिनुभएको छ । डा. अधिकारीकाअनुसार कोरोना सङ्क्रमितहरु स्वास्थ्यकर्मीको सम्पर्कमा रहेका र उनीहरुको स्वास्थ्य अवस्था सामान्य रहेको छ ।

मङ्गलबार दिउँसो ५७ जना कोरोनाभाइरस (कोभिड–१९) सङ्क्रमित भेटिएका थिए । स्वास्थ्य तथा जनसङ्ख्या मन्त्रालयका सह–प्रवक्ता डा. अधिकारीका अनुसार ५७ जनामध्ये पर्सा जिल्लाका ३९ जना, रुपन्देही जिल्लाका नौ जना, कपिलवस्तु जिल्लाका आठ जना र बारा जिल्लाका एक जनामा कोरोनाभाइरस सङ्क्रमण पुष्टि भएको हो । उनीहरु सबै पुरुष रहेका छन् । डा. अधिकारीकाअनुसार उनीहरुको पनि स्वास्थ्य अवस्था सामान्य रहेको छ भने उनीहरु स्वास्थ्यकर्मीको सम्पर्कमा रहेका छन् ।

मन्त्रालय स्रोतकाअनुसार पर्साको वीरगञ्जमा कोभिड–१९ सङ्क्रमित हुनेमा दुई जना पत्रकार पनि रहेका छन् । उनीहरुको परिचय गोप्य राखिएको छ ।