क्यान्सर अस्पतालको कार्यकारी निर्देशकमा डा. देजकुमार गौतम नियुक्त

चितवन । वीपी कोइराला मेमोरियल क्यान्सर अस्पताल भरतपुरको कार्यकारी निर्देशकमा डा. देजकुमार गौतम नियुक्त हुनु भएको छ । क्यान्सर अस्पतालको बोर्ड बैठकले उहाँलाई कार्यकारी निर्देशकमा नियुक्त गरेको हो । गौतमको कार्यकाल तीन वर्षको हुनेछ ।

डा. गौतम अस्पतालका नाक, कान, घाँटी रोग विभागका प्रमुख हुनुहुन्छ । उहाँले यस अघि नै क्यान्सर अस्पतालको उपनिर्देशक भई कार्य गरिसक्नु भएको छ । यसअघिका कार्यकारी निर्देशक डा. विजय आचार्यको तीनवर्षे कार्यकाल बैशाख २३ गतेबाट सकिएपछि बोर्डले डा. गौतमलाई कार्यकारी निर्देशक चयन गरेको हो ।

यसअघि स्वास्थ्य अनुसन्धान परिषद्को कार्यकारी प्रमुख डा. प्रदीप ज्ञवाली, क्यान्सर विज्ञ एवम् बोर्ड सदस्य डा. विनय ठाकुर र स्वास्थ्य मन्त्रालयका प्रतिनिधि रघुराम विष्ट सदस्य रहेको तीन सदस्यीय समितिले डा. गौतमको नाम सिफारिस गरेको थियो ।

नवनियुक्त कार्यकारी निर्देशक डा. गौतमले अस्पतालले प्रदान गर्ने सेवा सुविधालाई अझै सर्वसुलभ र सहज बनाउने विषयलाई प्राथमिकतामा राखेर काम गर्ने बताउनुभयो । उहाँले अस्पताललाई क्यान्सरको उपचार, अध्ययन–अध्यापन र अनुसन्धानको केन्द्रका रुपमा विकास गर्ने लक्ष्य राखेको बताउनुभयो ।

क्यान्सर रोगबाट बिरामीहरुलाई बचाउन विश्वमा विकसित भएका अत्याधुनिक प्रविधि र औजार उपकरणहरु भित्र्याएर अस्पताललाई थप व्यवस्थित गरिने डा. गौतमले न्यूजभित्तोलाई बताउनुभयो ।