नेपालगञ्जमा थप सात जनामा कोरोनाभाइरस सङ्क्रमण, नेपालमा सङ्क्रमितको सङ्ख्या ८२ पुग्यो

काठमाडौँ । बाँकेको नेपालगञ्जमा आज पुनः सात जनामा कोरोनाभाइरस (कोभिड–१९)को सङ्क्रमण देखिएको छ । स्वास्थ्य तथा जनसङ्ख्या मन्त्रालयका सहप्रवक्ता डा समिर अधिकारीले नेपालगञ्जस्थित भेरी अस्पतालमा परीक्षणका क्रममा नेपालगञ्ज उपमहानगरपालिका–८ का चार महिला र तीन पुरुषमा कोभिड–१९ को सङ्क्रमण देखिएको बताउनुभयो ।

उहाँका अनुसार २२, ३० र ४० वर्षीय पुरुष तथा ९ वर्षीय बालिका र ३२, ३४ र ५५ वर्षीया महिला रहेका छन् । बाँकेमा मात्र २३ जनामा सङ्क्रमण देखिएको छ । यसअघि बाँकेमा १६ जनामा सङ्क्रमण देखिएको थियो ।

योसँगै नेपालमा कोरोनाभाइरस सङ्क्रमितको सङ्ख्या ८२ पुगेको छ । सहप्रवक्ता डा अधिकारीका अनुसार नेपालगञ्जमा देखिएका सङ्क्रमितको स्वास्थ्य अवस्था सामान्य रहेको र उनीहरू स्वास्थ्यकर्मीको निगरानीमा रहेका छन् ।

कोरोना सङ्क्रमितको सङ्ख्या लगातार बढेपछि बाँकेको नेपालगन्जलाई आजदेखि निषेधित क्षेत्र घोषणा गरिएको छ । हिजो दिउँसो जिल्ला प्रशासन कार्यालयमा बसेको सर्वदलीय र सर्वपक्षीय बैठकले आज बिहान ११ बजेदेखि वैशाख २५ गतेसम्म नेपालगञ्जलाई पूर्णतः निषेधित क्षेत्र घोषणा गर्ने निर्णय गरेको थियो । बाँकेका प्रमुख जिल्ला अधिकारी कुमारबहादुर खड्काले संघीय सरकारले जारी राखेको लकडाउनसँगै नेपालगन्ज उपमहानगरपालिकामा वैशाख २३ गते बिहान ११ बजेदेखि २५ गते मध्यरातिसम्म पूर्ण निषेधित क्षेत्र घोषणा गरिएको जानकारी दिनुभएको छ ।