प्रविधिको प्रयोग गर्दै पत्रकार महासंघ चितवनको शुभकामना आदान प्रदान

चितवन । नेपाल पत्रकार महासंघ चितवन शाखाले प्रविधिका प्रयोग गर्दै अनलाईनमार्फत् विश्व प्रेस स्वतन्त्रता दिवसको शुभकामना आदान प्रदान कार्यक्रम आयोजना गरेको छ । शाखा अध्यक्ष राधेश्याम खतिवडाको संयोजनमा आईतबार साँझ ७ बजे जुम मार्फत् भच्र्युअल कन्फ्रेन्स गरी शुभकामना आदान प्रदान गरिएको हो ।

सो अवसरमा प्रेस युनियनका केन्द्रीय उपाध्यक्ष दीपक आचार्य, महासंघका केन्द्रीय सदस्य सिर्जना अर्याल, महासंघ चितवनका पूर्व अध्यक्षद्वय जनक अर्याल र हरिप्रसाद पोखरेल, पत्रकारहरु नारायणप्रसाद अधिकारी, तिलकराम रिमाल, रमेशकुमार पौडेल, अनिल ढकाल, तीर्थ नेपाल, प्रतिमा ढकाललगायतले मन्तव्य व्यक्त गर्नुभएको थियो । सो भच्र्युअल कन्फ्रेन्समा डेढ दर्जन बढी पत्रकारहरुको सहभागिता रहेको थियो ।

वक्ताहरुले वर्तमान परिवेशमा पत्रकारिता पेशा जटिल र चुनौतीपूर्ण बन्दै गएकोप्रति चिन्ता व्यक्त गर्दै आगामी दिनमा कसरी अगाडि बढ्न सकिन्छ भन्ने बारेमा विचार राख्नु भएको थियो । कोरोना भाईरस (कोभिड १९) का कारण उत्पन्न परिस्थितिले कतिपय पत्रकारको रोजगारी जोखिममा रहेको, सञ्चारमाध्यम सञ्चालनमा कठिनाई थपिंदै भन्दै उहाँहरुले असहज परिस्थितिको मिलेर सामना गर्नुपर्नेमा जोड दिनुभयो ।

शाखा अध्यक्ष खतिवडाले सहभागीहरुलाई धन्यवाद दिंदै पत्रकारका समस्याप्रति महासंघ सधैं चिन्तित रहेको बताउनुभयो । प्रत्येक वर्ष मे ३ तारिखका दिन विश्व प्रेस स्वतन्त्रता दिवस मनाईदै आएको छ । नेपाल सरकारले पनि तीन वर्ष यता यसै दिनलाई राष्ट्रिय सूचना तथा सञ्चार प्रविधि दिवसका रुपमा मनाउँदै आएको छ ।