नेकपा सचिवालय बैठकको निर्णय : बामदेवलाई उपयुक्त समयमा प्रतिनिधिसभाको उम्मेदवार बनाउने, स्थायी कमिटी बैठक वैशाख २५ गते

काठमाडौँ । नेपाल कम्युनिष्ट पाटी (नेकपा) को सचिवालयको प्रधानमन्त्री निवास बालुवाटारमा बसेको बैठकले पार्टी उपाध्यक्ष वामदेव गौतमलाई उपयक्त समयमा प्रतिनिधि सभामा लैजाने र पार्टीको स्थायी कमिटी बैठक बैशाख २५ गते बोलाउने निर्णय गरेर सम्पन्न भएको छ ।

२५ गते हुने स्थायी कमिटी बैठकको तयारीका लागि २४ गते सचिवालय बैठक बस्ने पार्टी प्रवक्ता नारायणकाजी श्रेष्ठले जानकारी दिनुभयो। श्रेष्ठले भन्नुभयो “बैठकले बामदेव गौतमलाई उपयुक्त समयमा प्रतिनिधिसभाको उमेद्वार बनाउन पहल गर्ने निर्णय गरेको छ ।”

पार्टी र सरकार सञ्चालनमा भएका कमिकमजोरीमा आत्मालोचना गर्दै अगाडि बढ्ने निर्णय भएको बताईएको छ । यस्तै बैठकमा पार्टी एकतालाई रक्षा गर्ने र सुदृढ गर्ने र पार्टीलाई गुटउन्मुख हुन नदिन पार्टीका सबैतहमा निर्देशन दिने पनि निर्णय गरेको छ ।