रेडियो नेपालकी प्रथम गायिक रानुदेवीको निधन

काठमाडौँ । रेडियो नेपालकी प्रथम गायिका रानुदेवी (रानुदेवी अधिकारी) को निधन भएको छ । ८८ वर्षीया रानुदेवीको केएमसी अस्पताल काठमाडौँमा उपचारका क्रममा निधन भएको हो । उहाँ अल्जाइमर्स र पार्किन्सन्स रोगबाट पीडित हुनुहुन्थ्यो । स्वर्गीय अधिकारीको आज विहान पशुपति आर्यघाटमा अन्त्येष्टी गरिएको छ ।

रानुदेवीले प्रजातान्त्रिक आन्दोलनको क्रममा २००७ सालमा तारिणीप्रसाद कोइरालाले विराटनगरमा स्थापना गरेको रेडियो नेपालबाट क्रान्तिको गीत गाउनुभएको थियो। नेपाली काँग्रेसकी नेतृ स्वर्गीय नोना कोइरालाकी बहिनी अधिकारीले इतिहासमा स्नात्तकोत्तर उत्तीर्ण गर्नुभएको थियो ।

रानुदेवीले २०२३ सालदेखि २०५३ सालसम्म अध्यापन गर्नुभएको थियो । उहाँका एक छोरा र दुई छोरी हुनुहुन्छ । २०३६ सालको शिक्षक आन्दोलनमा जेल पर्नुभएकी रानुदेवी जनआन्दोलनपछि केही समय नेपाल महिला संघ मोरङको अध्यक्षको जिम्मेवारीमा समेत रहनुभएको थियो ।