रोल्पामा बेवारिसे बम विस्फोटमा परेर चार बालबालिकाको मृत्यु

रोल्पा । रोल्पाको त्रिवेणी गाउँपालिका–७, गैरीगाउँमा आज साँझ भएको बम विस्फोटमा परी चार बालबालिकाले ज्यान गुमाएका छन् । गाउँदेखि केही टाढाको खोलामा बमको ठूलो आवाज आएपछि स्थानीयवासी हेर्न गएका थिए ।

उक्त बम विस्फोटमा परी चार बालबालिकाको घटनास्थलमै ज्यान गएको त्रिवेणी–२ का वडाध्यक्ष कविराज बुढाले जानकारी दिनुभयो । मृत्यु हुनेमा सातदेखि ११ वर्ष उमेरका तीन बालक र एक बालिका रहेका उहाँले जानकारी दिनुभयो ।

घटनास्थलमा बम पनि रहेकाले डिष्पोजका लागि दहवनस्थित नेपाली सेनाको टोली घटनास्थलतर्फ आउँदै गरेको वडाध्यक्ष बुढाले जानकारी दिनुभयो । घटना भएको प्रहरीले पुष्टी गरेको छ । घटना भएको जानकारी पाउने बित्तिकै प्रहरी टोली घटनास्थल पुगिसकेको जिल्ला प्रहरी कार्यालयका प्रहरी नायब उपरीक्षक चित्रबहादुर गुरुङले बताउनुभयो । बेबारिसे बम खेलाउँदा पड्किएर बालबालिकाको मृत्यु भएको सूचना आएपछि प्रहरी पठाइएको उहाँले बताउनुभयो ।