नेकपा सचिवालय बैठकको निर्णय : २० गते फेरि बस्ने

काठमाडौँ । निकै चर्चाका बीच आज साँझ बसेको सत्तारुढ नेपाल कम्युनिष्ट पार्टी (नेकपा) सचिवालयको बैठक फेरि अर्को पटक बस्ने गरी सकिएको छ । बैठकले आन्तरिक छलफल र सरसल्लाह जारी राख्दै आगामी बैशाख २० गते पुनः बस्ने निर्णय गरेको पार्टी प्रवक्ता नारायणकाजी श्रेष्ठले जानकारी दिनुभएको छ ।

बैठकपछि प्रवक्ता श्रेष्ठले जारी गर्नुभएको प्रेस विज्ञप्तिमा ‘बैठकमा पार्टीको आन्तरिक एकताको सुदृढीकरण, सरकारका काम कारबाही, स्थायी समितिको बैठकलगायत विभिन्न विषयहरूमा गहन छलफल भएको’ र ‘सबै सदस्यहरूले आ–आफ्ना धारणाहरू राख्नुभएको’ बताइएको छ ।

यस्तो छ प्रेस विज्ञप्ति :
नेपाल कम्युनिष्ट पार्टी (नेकपा) केन्द्रीय सचिवालयको बैठक पार्टी अध्यक्ष एवं प्रधानमन्त्री केपी शर्मा ओली र अर्का अध्यक्ष पुष्पकमल दाहाल ‘प्रचण्ड’को संयुक्त अध्यक्षतामा बालुवाटारमा बस्यो ।

बैठकमा पार्टीको आन्तरिक एकताको सुदृढीकरण, सरकारका काम कारबाही, स्थायी समितिको बैठकलगायत विभिन्न विषयहरूमा गहन छलफल भयो । सबै सदस्यहरूले आ–आफ्ना धारणाहरू राख्नुभयो ।

बैठकले आन्तरिक छलफल र सरसल्लाह जारी राख्दै आगामी बैशाख २० गते पार्टी सचिवालयको बैठक बस्ने निर्णय गरेको छ ।

नारायणकाजी श्रेष्ठ
प्रवक्ता
१७ बैशाख २०७७