कोरोना भाइरस सङ्क्रमण नियन्त्रण तथा उपचार कोषमा दुई अर्ब एघार करोड सङ्कलन

काठमाडौँ । कोरोना भाइरस (कोभिड–१९) सङ्क्रमण नियन्त्रण तथा उपचार कोषमा अहिलेसम्म दुई अर्ब ११ करोड ६५ लाख ५८ हजार दुई सय ७५ रुपैयाँ सङ्कलन भएको छ । प्रधानमन्त्री तथा मन्त्रिपरिषद् कार्यालयका प्रवक्ता राजेन्द्रकुमार पौडेलका अनुसार हिजो मङ्गलबार मात्र कोषमा एक करोड ३५ लाख तीन हजार चार सय २० रुपैयाँ जम्मा भएको छ ।

मङ्गलबार एभरेष्ट बैंकले ६० लाख, राष्ट्रिय योजना आयोगबाट चार लाख ६६ हजार दुई सय ३०, अख्तियार दुरुपयोग अनुसन्धान आयोग, प्रहरी कर्मचारीको तर्फबाट तीन लाख ९२ हजार नौ सय १३, भेरी प्राविधिक शिक्षालयबाट दुई लाख ९४ हजार आठ सय ५५, न्याय हेल्प नेपालबाट दुई लाख ७१ हजार २० रुपैयाँ तथा नाम नामेसी नखुलेका तथा एक लाख रुपैयाँ भन्दा कम सहयोग गर्ने विभिन्न व्यक्ति र संस्थाबाट ४५ लाख ५८ हजार ५९ रुपैयाँ सङ्कलन भएको छ ।

सरकारले कोभिड–१९ को रोकथाम र नियन्त्रणका लागि सहयोग पुर्याउन कोष स्थापना गरेको हो । कोषमा सङ्कलन भएको रकम कोभिड–१९ को रोकथाम र नियन्त्रणका लागि सरकारले खर्च गर्ने छ ।