चितवनको मानवअधिकारको अवस्थाका विषयमा प्रशासनसँग छलफल

चितवन । चितवन जिल्ला स्तरीय मानवअधिकार अवस्था अनुगमन समितिले आज जिल्लाको वस्तुअवस्थाका विषयमा स्थानीय प्रशासनसँग छलफल गरेको छ । जिल्ला प्रशासन कार्यालय, चितवन भएको छलफलमा प्रमुख जिल्ला अधिकारी नारायण प्रसाद भट्टराईले कोभिड–१९ रोकथामका सन्दर्भमा हाल जिल्लामा सरकारका तर्फबाट भए गरिएका कार्यहरुबारे जानकारी गराउनु भएको थियो ।

प्रजिअ भट्टराईले रोग फैलन नदिन उच्च सावधानी अपनाईएको, सिमामा निगरानी, चेकजाँच कडा पारिएको, सडकमा अलपत्र परेकालाई सहयोग पुर्याइएको, आवश्यकता अनुसार स्वास्थ्य परीक्षण जारी राखिएको, स्थानीय तह मार्फत राहत वितरण गरिएको जानकारी दिनुभयो । अहिलेसम्म तीन सय ५० जनाको आरडिटि र तीन सय जना भन्दा बढीको पिसिआर परीक्षण भएको उहाँले जानकारी दिनुभयो । उहाँले थप किटको केन्द्रमा माग गरिएको र छिट्टै आईपुग्ने जनाउँदै परीक्षण तिव्र रुपमा अघि बढ्ने बताउनुभयो ।

छलफलमा समितिका अध्यक्ष कमलराज पाठक, सदस्यहरु तीर्थ नेपाल र सुरेश अधिकारी सहभागी हुनुहुन्थ्यो । समितिका तर्फबाट अध्यक्ष पाठकले राष्ट्रिय मानवअधिकार आयोगबाट प्राप्त अनुगमन कार्यविधिबारे जानकारी गराउनुभएको थियो । कोभिड–१९ का सन्दर्भमा गठित जिल्ला स्तरीय मानवअधिकार अवस्था अनुगमन समितिले सरकारका कामकारवाही, सर्वसाधारणको अवस्था, मानवअधिकारको अवस्था लगायतका विषयमा नियमित रुपमा सम्बन्धित पक्षहरुसँग छलफल र अनुगमन जारी राख्ने अध्यक्ष पाठकले जानकारी दिनुभयो ।