पूर्वी चितवनमा हावाहुरी र असिनाबाट भएको क्षतिको विवरण तत्काल लिईने

चितवन । गएको शनिवार साँझ आएको हावाहुरी र असिनाले पूर्वी चितवनको नगदे बालीमा पारेको असरको तत्काल लगत सङ्कलन गरिने भएको छ । जिल्ला समन्वय समिति चितवनले आइतबार आयोजना गरेको कृषिजन्य उत्पादनका कृयाकलापहरुलाई सञ्चालन गर्नका लागि समन्वयात्मक बैठकमा तत्काल क्षतिको लगत सङ्कलन गर्ने निर्णय गरिएको हो ।

कालिका, रत्ननगर र खैरहनी नगरपालिकामा परेको असिना पानी र हावाहुरीले मकै, तरकारी र केरामा क्षति पुगेको छ । क्षतिको कृषि ज्ञानकेन्द्र भरतपुरले प्रधानमन्त्री कृषि आधुनिकिकरण परियोजना र स्थानीय तहहरुसँग समन्वय गरेर विवरण लिई जिल्ला विपद् व्यवस्थापन समितिमार्फत सम्बन्धित निकायमा पठाईने भएको छ ।

बैठकमा जिल्ला समन्वय समिति चितवनका प्रमुख कृष्णकुमार डल्लाकोटीले हावाहुरी र असिनाका कारण पूर्वी चितवनका कृषकले ठूलो नोक्सानी व्यहोर्नु परेको भन्दै राहतका लागि आवश्यक पहल थाल्नुपर्ने बताउनुभयो । कृषि ज्ञान केन्द्रको सिफारिसमा साल्ट ट्रेडिङ्ग र कृषि सामग्री संस्थानले मल, बिउ वितरण गर्न आग्रह गर्दै अहिलेका बालीलाई आवश्यक पर्ने मल, बिउ व्यवस्थापन गर्न उहाँले आग्रह गर्नुभयो ।

प्रमुख जिल्ला अधिकारी नारायण प्रसाद भट्टराईले मल, बिउ, औजार र कृषिजन्य उत्पादनको ढुवानीमा रोक नलगाईएको तर भीडभाड गर्न नहुने बताउनुभयो । कृषि ज्ञान केन्द्रको सिफारिसमा कृषिजन्य उत्पादन र बजारीकरणमा सहजीकरण गर्न प्रशासन सकारात्मक रहेको उहाँले बताउनुभयो ।

सो अवसरमा कृषि ज्ञान केन्द्रका प्रमुख राजन ढकाल, प्रधानमन्त्री कृषि आधुनिकिकरण परियोजना चितवनका प्रमुख मेघनाथ तिमिल्सिना, साल्ट ट्रेडिङ्ग लिमिटेड चितवनका प्रमुख बुद्धि बिनोद दाहाल र कृषि सामाग्री केन्द्र चितवनका प्रमुख रबिन्द्र गौतमले कृषि उत्पादन, बजारीकरण र मल, बिउको अहिलेको अवस्थाको बारेमा जानकारी गराउनु भएको थियो ।