शंकास्पद देखिएपछि चितवनका दुई जनाको नमूना थप परीक्षणका लागि काठमाडौँ पठाईयो

चितवन । पूर्वी चितवनका दुई जनाको कोभिड १९ को नमूना परीक्षण शंकास्पद देखिएको छ । भरतपुर कोभिड १९ प्रयोगशालामा परीक्षणका क्रममा दुई वटा नमूना शंकास्पद देखिएपछि काठमाडौँ पठाईएको हो । बिहीबार भरतपुर कोभिड–१९ परीक्षण प्रयोगशालामा गरिएको पीसीआर परीक्षणमा दुई जनाको नमूना शंकास्पद देखिएको भरतपुर अस्पतालका मेडिकल सुपरिटेण्डेण्ट डा. श्रीराम तिवारीले जानकारी दिनुभयो ।

उहाँका अनुसार शुक्रबार (आज) बिहान ३ बजे सो को नमूना राष्ट्रिय जनस्वास्थ्य प्रयोगशाला काठमाडौँ पठाईएको छ । बुधबार र्‍यापिड डाईग्नोष्टिक टेष्टका क्रममा एक जना महिलाको शंकास्पद नतिजा आएको थियो । उनी र उनका दुई छोरालाई सोही दिनदेखि भरतपुर अस्पतालको आईसोलेसनमा राखिएको छ । उनीहरु मध्ये आमा र एक छोराको नमूना शंकास्पद आएको भरतपुर अस्पतालले जनाएको छ ।

प्रयोगशाला श्रोतका अनुसार उनीहरुको परीक्षण पोजेटिभ देखिएपछि थप पुष्टिका लागि काठमाडौँ पठाईएको हो ।

उनीहरु अहिले पनि भरतपुर अस्पतालको आईसोलेसनमा रहेका छन् । चैत ५ गते उनीहरु बेलायतबाट हङकङ हुँदै नेपाल आएका थिए। उनीहरु पूर्वी चितवनको राप्ती नगरपालिकाका बासिन्दा भएको जनाईएको छ ।