चितवनमा अत्यावश्यक सामान किन्ने समय बिहान १० देखि ४ बजेसम्म मात्रै

चितवन । जिल्लामा अत्यावश्यक वस्तुको खरिद बिहान १० बजेदेखि दिउँसो ४ बजेसम्म खुल्ला गरिने भएको छ । जिल्ला सुरक्षा समितिको आज बिहीबार बसेको बैठकले उक्त निर्णय गरेको हो ।

बैठकपछि जारी सूचनामा वैशाख ४ गते मध्यरातदेखि वैशाख १५ गते मध्यरातसम्मका लागि उक्त नियम लागू हुने जनाईएको छ ।

प्रशासनले खुल्ला गर्ने पाईने पसलहरुको सूची समेत उल्लेख गरेको छ । जसमा औषधि, खानेपानीका जार बेच्ने थोक पसल, ग्याँस डिपो, सञ्चालन अनुमति प्राप्त सवारीलाई मात्र इन्धन भर्न पाउने गरी पेट्रोल पम्प, खाद्यान्न मात्र बिक्री गर्ने पसल, पशुपंक्षीको दाना बिक्री गर्ने पसल, ठेलागाडा र साइकलमा तरकारी बेच्ने पसल र डेरी मात्रै सञ्चालन गर्न पाउने जनाईएको छ ।

यो अवधिमा चल्न पाउने सवारीहरुको पनि प्रशासनले सूचि सार्वजनिक गरेको छ । एम्बुलेन्स, शववाहन, दमकल, राजमार्गमा यात्रा गर्ने मालवाहक सवारीसाधन, भित्री बाटोको हकमा तरकारी, खाद्यान्न, दूध र पशुपक्षीको दाना बोकेका सवारी साधनहरु, सुरक्षा निकायले प्रयोग गर्ने सवारी साधन, र ड्यूटी रोष्टर सहित परिचयपत्र वाहक स्वास्थ्यकर्मीहरुका मात्रै सवारी साधन सञ्चालन गर्न पाईने उल्लेख छ । स्वास्थ्यकर्मीको हकमा घरदेखि अस्पतालसम्मको बाटोमा मात्रै प्रयोग गर्न पाउने उल्लेख छ ।

संक्रामण रोक ऐन २०२० दफा २ तथा स्थानीय प्रशासन ऐनको दफा ६ को उपदफा ३ बमोजिम यो आदेश जारी गरिएको जनाईएको छ ।