कोभिड–१९ : सङ्क्रमितको सङ्ख्या बीस लाख नाघ्यो, सङ्क्रमित ३१ प्रतिशत अमेरिकन

काठमाडौँ । विश्वभर महामारीको रुपमा फैलिएको कोभिड–१९ (कोरोनाभाइरस) बाट बीस लाख भन्दा बढी मानिस सङ्क्रमित भएका छन् । पछिल्लो अद्यावधिक गरिएको विवरण अनुसार कोरोनाबाट विश्वमा बीस लाख सात सय २८ मानिस सङ्क्रमित भएका छन् ।

वल्डवमिटरले सार्वजनिक गरेको पछिल्लो अपडेटअनुसार एक लाख २६ हजार सात सय ७६ जनाको मृत्यु भएको छ । चार लाख ८४ हजार सात सय ८१ जना भने उपचारपछि घर फर्किएका छन् । वल्डवमिटर संयुक्त राष्ट्रसङ्घ (युएन) डब्लुएचओ, खाद्य र कृषि सङ्गठन (एफएओ) तथा अन्तर्राष्ट्रिय मुद्राकोष (आइएमएफ) का विज्ञ समूह सहभागी संस्था हो । यस संस्थाले विश्वका विभिन्न तथ्याङ्क सार्वजनिक गर्दै आएको छ ।

कोरोनाभाइरसबाट संयुक्त राज्य अमेरिकामा मात्रै छ लाख १४ हजार दुई सय ४६ मानिस सङ्क्रमित भएका छन् । जुन विश्वभर सङ्क्रमितको सङ्ख्यामा झण्डै ३१ प्रतिशत (३०.७० प्रतिशत) हो । अमेरिकामा कोरोना सङ्क्रमणबाट २६ हजार ६४ मानिसको ज्यान गएको छ । अमेरिकाको जोन्स हप्किन्स विश्वविद्यालयले मृतकमध्ये एक तिहाई न्यूयोर्कका रहेका जनाएको छ ।

कोरोनाभाइरसबाट इटलीमा २१ हजार ६७ जनाको मृत्यु भएको छ । इटलीमा यसबाट एक लाख ६२ हजार चार सय ८८ मानिस सङ्क्रमित भएका छन् । त्यस्तै, स्पेनमा १८ हजार दुई सय ५५ जनाको मृत्यु भएको छ । यहाँ एक लाख ७४ हजार ६० जना सङ्क्रमित भएका छन् ।