सनसिटी अपार्टमेन्टका दुई जनामा कोरोना संक्रमणको पुष्टि, सङ्क्रमित ८१ वर्षिया महिला र ५८ वर्षिय पुरूष

काठमाडौँ । कागेश्वरी मनोहरा नगरपालिका–९ काँडाघारी, पेप्सीकोलास्थित सनसिटी अपार्टमेन्टबाट पाटन अस्पतालमा लगेर भर्ना गरिएका एकै परिवारका दुई जनामा कोरोना भाइरस (कोभिड–१९) सङ्क्रमण भएको पुष्टि भएको छ । सोही परिवारका अर्का एक जनाको भने रिपोर्ट आउन बाँकी छ ।

तीन जनामध्ये ८१ वर्षिया महिला र ५८ वर्षिय पुरूषमा कोरोना भाइरसको संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ । उनीहरु आमा छोरा हुन् । सो परिवारकी बुहारीको भने पहिलो परीक्षणमा कोभिड–१९ नदेखिएको मन्त्रालयले जनाएको छ ।

चैत ५ गते लण्डनबाट काठमाडौँ आएका उनीहरूको सोमबार र्यापिड टेष्टका क्रममा एन्टीबडी पोजेभिट देखिएपछि पाटन अस्पताल भर्ना गरेर थ्रोट स्वाब सङ्कलन गरिएको थियो । पीसीआरबाट थप परिक्षण गर्दा समेत पोजेटिभ रिपोर्ट देखिएको मन्त्रालयले जनाएको छ ।

उक्त अपार्टमेन्टमा बस्ने व्यक्तिहरूको परीक्षण आजैबाट सुरू गरिएको र उनीहरूसँग संलग्नको कन्ट्याक ट्रेसिङसमेत सुरू भएको स्वास्थ्य तथा जनसङ्ख्या मन्त्रालयले जानकारी दिएको छ ।

‘र्यापिड डाइग्नोस्टिक टेस्ट’ गर्दा कोरोना संक्रमणको आशंका देखिएपछि सनसिटी अपार्टमेन्ट प्रहरीले हिजोदेखि ‘सिल’ गरेको छ । सिल अवधिसम्म अपार्डमेण्टमा बस्नेहरू आफूखुशी बहिर निष्कन पाउने छैनन्। महानगरीय प्रहरी परिसर काठमाडौँका प्रवक्ता होविन्द्र बोगटीले अपार्टमेण्टमा आवतजावत पूर्णरुपमा रोक लगाइएको बताउनुभयो । सनसिटी अपार्टमेण्टमा ए, बी, जे, एच र आई गरी अपार्टब्लकहरू छन् ।