आज कानुन दिवस मनाइँदै

काठमाडौं । आज कानुन दिवस, कानुन र न्याय क्षेत्रमा संलग्नहरुले विभिन्न कार्यक्रम गरी मनाउँदैछन् । नेपालमा विक्रम संवत् २००८ सालमा प्रधान न्यायालय ऐन जारी भएको थियो । त्यसमा २००९ साल वैशाख २६ गते तत्कालीन राजा त्रिभुवनले लालमोहर लगाएर कार्यान्वयनमा ल्याएका थिए ।

सोही दिनको स्मरणमा हरेक वर्ष २६ वैशाखलाई कानून दिवसको रुपमा मनाइन्छ । दिवसको अवसरमा सर्वोच्च अदालत परिसरमा आज दिउँसो जलपान कार्यक्रम आयोजना गरिएको छ ।

कानुन दिवसको अवसरमा प्रधानन्यायाधीश चोलेन्द्र समशेर राणाले शुभकामना सन्देश दिँदै विधिको शासन सुनिश्चिताका लागि योगदान गर्ने प्रेरणा मिलोस् भन्ने शुभकामना व्यक्त गर्नुभएको छ । प्रधानन्यायाधीश राणाले जनआस्थामा आधारित न्याय पद्धतिको स्थापना र विकास गर्न आजको दिनले थप हौसला प्रदान गर्ने विश्वाससमेत व्यक्त गर्नुभएको छ ।

‘स्वतन्त्र न्यायपालिका, विधिको शासन, संवैधानिक सर्वोच्चता एवम् लोकतान्त्रिक मूल्य मान्यताप्रति प्रतिबद्ध रहँदै निष्पक्ष र सक्षम न्यायपालिकाको प्रवर्द्धन र सहज पहुँचयुक्त एवम् जनआस्थामा आधारित न्याय पद्धतिको स्थापना र विकास गर्न आजको दिनले थप हौसला प्रदान गर्ने विश्वास समेत लिएको छु’ प्रधानन्यायाधीश राणाले शुभकामना सन्देशमा भन्नुभएको छ ।