नेपालमा कोरोना सङ्क्रमितको सङ्ख्या नौ पुग्यो, एकैदिन भेटिए तीन सङ्क्रमित

काठमाडौँ । नेपालमा कोरोना भाइरस (कोभिड–१९) सङ्क्रमितको सङ्ख्या नौ पुगेको छ । आज एकैदिन तीन जनामा कोरोना भाइरस सङ्क्रणको पुष्टि भएपछि नेपालमा सङ्क्रमितको सङ्ख्या नौ पुगेको स्वास्थ्य तथा जनसङ्ख्या मन्त्रालयले जानकारी दिएको छ ।

मन्त्रालयले केहीबेर अघिमात्रै आफ्नो आधिकारिक फेसबुक पेजमार्फत आज तीन जनामा कोरोना भाइरस सङ्क्रण पुष्टि भएको जानकारी गराएको हो । मन्त्रालयका अनुसार कोरोना भाइरस सङ्क्रमित हुनेहरुमा भारतको मुम्बईबाट फर्किएका २१ वर्षीय युवक, भारतको उत्तराखण्डबाट कञ्चनपुर फर्किएका ४१ वर्षीय पुरुष र यसअघि कैलालीमा कोरोना सङ्क्रमण देखिएका ३४ वर्षीय पुरुषका आफन्त ३४ वर्षीया महिला रहेका छन् ।

स्वास्थ्य तथा जनसङ्ख्या मन्त्रालयको इपिडिमियोलोजी तथा रोग नियन्त्रण महाशाखाका निर्देशक डा. वासुदेव पाण्डेले उनीहरुको केही दिनअघि स्वाब लिएकोमा परीक्षणका क्रममा सङ्क्रमण देखिएको बताउनुभयो । तीनै जनाको अहिले धनगढीस्थित सुदूरपश्चिम प्रादेशिक अस्पतालमा उपचार भइरहेको छ । यसअघि विदेशबाट आएकालाई मात्रै कोभिड–१९ को सङ्क्रमण देखिएपनि पहिलो पटक नेपालभित्रकै महिलामा सङ्क्रमण देखिएको हो । गत माघ ९ गते चीनबाट नेपाल आएका विद्यार्थीमा कोभिड–१९ को सङ्क्रमण देखिएको थियो । उनी निको भई घर फर्किसकेका छन् । अन्य सङ्क्रमितको भने आइसोसेलनमा राखि उपचार भइरहेको मन्त्रालयले जनाएको छ ।