अस्पताल जानै चाहँदैनन् विरामी, चिकित्सक भन्छन् : अस्पताल आउन डर मान्नुपर्दैन
तपाईको प्रतिक्रिया
चितवन । यतिबेला कोरोना भाइरस (कोभिड–१९) को सम्भावित जोखिमले विरामी सकेसम्म अस्पताल जान चाहँदैनन् । कोरोनाको जोखिमले रोग पालेर बसिरहँदा दीर्घरुपमा समस्या पर्न सक्ने भन्दै चिकित्सकले अहिले बढी सजग हुन सुझाव दिएका छन् ।
भरतपुर अस्पतालका अध्यक्ष डा. भोजराज अधिकारी कोरोनाको डर हृदयघात भन्दा चर्को जस्तो देखिएको बताउनुहुन्छ । उहाँले आफुले गत वर्षहरुमा यो समयमा दैनिक करिव २० जना विरामीको जाँच गर्ने गरेको तर अहिले दुई जना पनि नआउने गरेका बताउनुभयो । टेलिफोन गरेर सोधपुछ गर्ने भए पनि रोग पालेर बसेका छन् की भन्ने चिन्ता हुन थालेको डा अधिकारीको भनाई छ ।
उहाँले घरमानै बसेर परामर्शमा औषधि खाएर हुने बाहेक सम्भावित जटिल हुन सक्ने खालका विरामीलाई अस्पताल आउन आग्रह गर्नुभयो । डा अधिकारीले भन्नुभयो “अस्पताल आउनै पर्ने विरामीले डर मान्नुपर्दैन । उच्च जोखिमका रोग पालेर बस्नुहुँदैन । ”
जिल्ला स्वास्थ्य कार्यालय चितवनका प्रमुख दिपक तिवारीका अनुसार गएको आठ दिनमा जिल्लाका सबै अस्पताल र स्वास्थ्य केन्द्रमा ३ हजार ८२९ जना विभिन्न रोगका विरामीले सेवा लिएका थिए । ती मध्ये ८५० जना ज्वरोका र ६२ जना रुघाघोकिका रहेका थिए । गतवर्ष यतिवेला जिल्लाका अस्पतालहरुमा ७ हजार भन्दा बढि विरामीले सेवा लिएका थिए ।
जिल्लामा केन्द्रीयस्तरको भरतपुर अस्पताल, दुई नीजि मेडिकल कलेज, २० नीजि अस्पताल, तीन सरकारी अस्पताल, तीन प्राथमिक स्वास्थ्य केन्द्र, ३६ स्वास्थ्य चौकी, २५ वटा ग्रामिण शहरी स्वास्थ्य केन्द्र र पाँच वटा सामुदायिक इकाई रहेका छन् । स्वास्थ्य कार्यालयका प्रमुख तिवारीले घरबाटै चिकित्सक तथा स्वास्थ्यकर्मीसँग परामर्श गर्ने काम भइरहेको र अस्पताल आउन डर मानेर पनि विरामी नआएको हुन सक्ने बताउनुहुन्छ ।
भरतपुर अस्पतालका सूचना अधिकारी लिलाधर पौडेल गतवर्ष यस समयमा दैनिक एक हजार पाँच सय भन्दा बढि विरामी आउने गरेका भए पनि शुक्रबार एक सय पचास जना बिरामी मात्र आएको बताउनुहुन्छ । त्यति नै सङ्ख्यामा बिरामी आउने चितवन मेडिकल कलेजमा शुक्रबार करिव एकसय जना मात्र विरामीले सेवा लिएका थिए ।
भरतपुर अस्पतालका पूर्व मेडिकल सुपरिटेण्डेन्ट प्राडा कृष्णप्रसाद पौडेले चिकित्सकले आफ्नो सेवा निरन्तर जारी राखेको बताउनुहुन्छ । टेलिफोनमा बुझेर अस्पताल आउनै पर्नेलाई ढुक्कसँग आउन उहाँले आग्रह गर्नुभयो ।
नेपाल चिकित्सक सङ्घ चितवनका अध्यक्ष एवम् बरिष्ठ फिजिसियन डा. प्रकाश खतिवडा पुराना रोगहरु मधुमेह, उच्च रक्तचाप, थाइराइड, दम जस्ता समस्यामा सम्बन्धित चिकित्सकसँग परामर्श गरेर औषधि प्रयोग गर्न सुझाब दिनुहुन्छ । दम बढ्यो या अन्य कारणहरुले उच्च ज्वरो आउँदा अस्पताल आउनै पर्ने बताउनु हुन्छ । ज्वरो कोरोनाका कारण मात्र नभए डेंगु, मलेरीया, स्क्रबटाईफस, हेपाटाईटिस जस्ता कारणले पनि हुने भएकाले कारणको खोजि गर्नुपर्ने उहाँको भनाई छ ।
नेपाल पत्रकार महासङघ, चितवनका अध्यक्ष राधेश्याम खतिवडा भ्रमका कारण जोखिम बढेको बताउनुहुन्छ । ‘बाहिर सर्बसाधारणमा चिकित्सकले बिरामी छुँदैनन्, अस्पतालले भर्ना लिँदैनन् र ढोकाबाटै फर्काउँछन्’ भन्ने हल्लाका कारण विरामी अस्पताल नआउने गरेको उहाँको भनाई छ ।
यस सम्बन्धमा नेपाल पत्रकार महासङघ, चितवनका अध्यक्ष राधेश्याम खतिवडाले आफ्नो फेसबुक वालमा लेख्नुभएको स्टाटस यस्तो छ :
उक्त स्टाटसमा विमलराज पौडेलले लेख्नुभएको कमेन्ट :