नेपालमा अर्का एकजनामा कोरोना भाइरसको सङ्क्रण, देशभित्र सङ्क्रमितको सङ्ख्या छ पुग्यो

काठमाडौं । नेपालमा अर्का एकजना कोरोना भाइरस सङ्क्रमित भेटिएका छन् । यो समेत देशभित्र कोरोना भाइरस सङ्क्रमितको सङ्ख्या छ पुगेको छ ।

स्वास्थ्य तथा जनसङ्ख्या मन्त्रालयका प्रवक्ता डा. विकास देवकोटाले राष्ट्रिय जनस्वास्थ्य प्रयोगशालामा आज गरिएको परीक्षणमा ती व्यक्तिमा कोरोना भाइरस (कोभिड–१९) सङ्क्रमण भएको पाइएको बताउनुभयो । प्रवक्ता देवकोटाले क्यूआर ६५२ उडानमा दोहाबाट काठमाडौँ आएका ती व्यक्तिमा कोरोना सङ्क्रमण पुष्टि भएको जानकारी दिनुभयो ।

यसअघि चैत ४ गते सोही उडानबाट आएका दुई जनामा कोरोना सङ्क्रमण पाइएको थियो । यसअघि दोस्रो र पाँचौँ कोरोना सङ्क्रमण पुष्टि भएका दुई युवतीसँगै एउटै जहाजमा स्वदेश आएका अर्का व्यक्तिमा कोरोनाको संक्रमण देखिएको हो ।

स्वास्थ्य तथा जनसंख्या मन्त्रालयका प्रवक्ता डा. देवकोटाले छैटौँ सङ्क्रमितलाई पनि चिकित्सकले छुट्टै राखेर उपचार शुरु गरेका जानकारी दिनुभयो । नेपालमा कोरोना भाइरसको सङ्क्रमण पुष्टि भएका छ जनामध्ये एक जना उपचारपछि घर फर्किसकेका छन् भने अन्य पाँच जनाको अस्पतालमा उपचार भइरहेको छ ।