‘लकडाउन’का कारण सहाराको घरका बालबालिकालाई खाद्यान्न अभाव

लक्ष्मण गौतम
चितवन । कोरोना भाईरस सङ्क्रमणको जोखिम अन्त्यका लागि सरकारले आह्वान गरेको लकडाउनका कारण चितवनको भरतपुरस्थित सहाराको घरमा आश्रित बालिबालिकालाई खाद्यान्न अभाव भएको छ । लगातारको लकडाउनका कारण सहाराको घरमा दैनिक उपभोग्य सामानको अभाव भएको सहारा घरकी सञ्चालक स्वस्तिका तिवारीले बताउनुभएको छ ।

सहाराको घरमा अनाथ बालबालिका आश्रित छन् । मौजात रहेको दैनिक उपभोग्य सामान चामल, दाल, ग्यास, तरकारी लगायतका सामान सकिएको र कतैबाट आउने क्रम पनि नभएका कारण बालबालिकालाई दैनिक रुपमा गुजारा चलाउन पनि समस्या भएको तिवारीले बताउनुभयो ।

अहिले विद्यालय पनि बन्द भएका र स्वास्थ्य अवस्थाको ख्याल गर्दै बालबालिकालाई घरभित्रै राख्नु पर्नै बाध्यताका कारण पर्याप्त सामान नभएकोले समस्या भएको सहारा घरका सञ्चालकको भनाई छ। वि.सं. २०६९ सालमा स्थापना भएको सहारा घरमा १८ जना अनाथ बालबालिका रहेका छन् ।