नेपाल एयरलाइन्सको जहाज नेपालगञ्जमा दुर्घटना, सवार सबै सकुशल

नेपालगञ्ज । रााष्ट्रिय ध्वजाबाहक नेपाल वायु सेवा निगम (नेपाल एयरलाइन्स) को वाई १२ जहाज आज नेपालगञ्ज विमानस्थलको धावनमार्गमा चिप्लिएर दुर्घटना भएको छ । जहाज दुर्घटनापछि त्यसमा सवार सबैजनालाई तत्काल सकुशल उद्धार गरिएको छ ।

काठमाडौँबाट कोरोना भाइरसका लागि चिकित्सक र औषधिजन्य सामग्री लिएर आएको नेपाल एयरलाइन्सको जहाज नेपालगन्ज विमानस्थलमा अवतरण गर्ने क्रममा धावन मार्गदेखि ६० मिटर टाढा दक्षिणतिर चिप्लिएर दुर्घटना भएको नेपालगञ्ज उड्डयन प्राधिकरणका प्रमुख प्रेमनारायण ठाकुरले जानकारी दिनुभयो ।

नेपाल एयरलाइन्सको जहाज दुर्घटना भएलगत्तै उद्धार टोली खटिएको र जहाजमा रहेका चालक दललगायत चिकित्सकसहित पाँचजनालाई तत्काल सकुशल उद्धार गरिएको र औषधि पनि निकालिसकिएको प्रमुख ठाकुरले बताउनुभयो ।

बाँके र धनगढीका क्वारेन्टाइनमा राखिएका बिरामीबाट सङ्कलन गरिएको नमूना लिनका लागि आएको जहाज धावनमार्गमा चिप्लिएपछि नेपाल एयरलाइन्सकै अर्को जहाज इन्जिनियरसहितको टोली लिएर नेपालगञ्ज आउँदै गरेको र दुर्घटनाका कारण पछि खुल्ने उहाँले बताउनुभयो ।